ഉത്തരാഖണ്ഡില് നിന്ന് ദില്ലിയിലേക്കുള്ള യാത്രയ്ക്കിടെ ഹമ്മദ്പൂര് ഝാലിന് സമീപം റൂര്ക്കിയിലെ നര്സന് അതിര്ത്തിയില് വെച്ചാണ് ക്രിക്കറ്റ് താരം ഋഷഭ് പന്ത് സഞ്ചരിച്ച കാര് അപകടത്തില്പ്പെട്ടത്. രാവിലെ 5.30ന ഉത്തരാഖണ്ഡില് നിന്ന് ദില്ലിയിലേക്കുള്ള യാത്രയ്ക്കിടെയാണ് അപകടം. ഋഷഭ് സഞ്ചരിച്ച കാർ ഡിവൈഡറിൽ ഇടിക്കുകയായിരുന്നു. ഡിവൈഡറിൽ ഇടിച്ചു തീപിടിച്ച കാർ പൂർണമായും കത്തി നശിച്ചു. ഡ്രൈവിംഗിനിടെ ഉറങ്ങിപ്പോയതായി പന്ത് പൊലീസിനോട് വ്യക്തമാക്കി. കടുത്ത മൂടല് മഞ്ഞ് ഉണ്ടായിരുന്ന സമയം കൂടിയായിരുന്നത്. വാഹനത്തിന്റെ ചില്ലുകള് തകര്ത്താണ് താരത്തെ രക്ഷപ്പെടുത്തിയതെന്ന് ഉത്തരാഖണ്ഡ് പൊലീസ് ഡയറക്ടര് ജനറല് അശോക് കുമാര് വ്യക്തമാക്കിയിരുന്നു. അപകടത്തിൽ കാലിനും തലയ്ക്കും സാരമായി പരിക്കേറ്റ ഋഷഭിനെ ഡെറാഡൂണിലെ മാക്സ് ആസ്പത്രിയിൽ പ്രവേശിപ്പിച്ചിരിക്കുകയാണ്.
ചികിത്സയ്ക്കായി ഇവിടെ നിന്നും ഡൽഹിയിലേക്ക് കൊണ്ടുപോകുമെന്നാണ് പുറത്തുവരുന്ന റിപ്പോർട്ടുകൾ.
അപകടസമയത്ത് കാറില് ക്രിക്കറ്റ് താരം തനിച്ചായിരുന്നു. തലയ്ക്കും കാല്മുട്ടിനും പരിക്കേറ്റു. പുറത്ത് പൊള്ളലേറ്റ നിലയിലാണുള്ളത്. താരത്തിന്റെ ചികിത്സയുടെ മുഴുവന് ചെലവും സംസ്ഥാനം വഹിക്കുമെന്ന് ഉത്തരാഖണ്ഡ് മുഖ്യമന്ത്രി പുഷ്കര് സിംഗ് ധാമി പറഞ്ഞു. പന്തിന് ഒരു വര്ഷത്തേക്കെങ്കിലും ക്രിക്കറ്റ് കളിക്കാനാവില്ലെന്നാണ് പുറത്തുവരുന്ന വിവരം. ശ്രീലങ്കയ്ക്കെതിരായ നിശ്ചിത ഓവര് ക്രിക്കറ്റ് പരമ്പരയ്ക്കുള്ള ടീമില് നിന്ന് പന്തിനെ ഒഴിവാക്കിയിരുന്നു. കാല്മുട്ടിലെ പരിക്ക് ഭേദപ്പെടുന്നതിനായി റിഷഭ് പന്തിനോട് രണ്ടാഴ്ച ബെംഗളൂരുവിലെ ദേശീയ ക്രിക്കറ്റ് അക്കാഡമിയില് റിപ്പോര്ട്ട് ചെയ്യാന് ആവശ്യപ്പെട്ടിരുന്നു. ജനുവരി 3 മുതല് 15 വരെയാകും എന്സിഎയില് പന്തിന്റെ പരിശീലനം നിശ്ചയിച്ചിരുന്നു. കാല്മുട്ടിന് നേരിയ പരിക്ക് കുറച്ചുനാളുകളായി പന്തിനെ അലട്ടിയിരുന്നു.