കൊച്ചി: സംസ്ഥാനത്തെ സ്വകാര്യആശുപത്രികളിലെ നഴ്സുമാരുടെ വേതനവ്യവസ്ഥയിൽ ഹൈക്കോടതി ഇടപെട്ടു. മൂന്നുമാസത്തിനുള്ളിൽ വേതനം പുന:പരിശോധിക്കണമെന്നാണ് കോടതി സർക്കാരിനോട് നിർദേശിച്ചിരിക്കുന്നത്. സ്വകാര്യആശുപത്രികളിലെ നഴ്സുമാരോടും ആശുപത്രി ഉടമകളോടും അഭിപ്രായം ചോദിച്ചശേഷം തീരുമാനമെടുക്കണം എന്നും കോടതി പറഞ്ഞു.
സ്വകാര്യആശുപത്രികളിലെ നഴ്സുമാരുടെ വേതനം അവസാനമായി പുതുക്കിയത് 2018 ലാണ്. എന്നാൽ ഇതിൽ ആയുർവേദം ഉൾപ്പെടെയുള്ള ചികിത്സ മേഖലകളിലെ നഴ്സുമാരുടെ വേതനത്തിൽ മാറ്റം വരുത്തിയിട്ടില്ലെന്ന് യു എൻ എയും തങ്ങളുടെ ഭാഗം കേൾക്കാതെയാണ് വേതനം പരിഷ്കരിച്ചത് എന്ന് സ്വകാര്യ ആശുപത്രി മാനേജ്മെന്റും വാദിച്ചു. വാദംകേട്ട കോടതി 2018ലെ വേതന ഉത്തരവ് റദ്ദാക്കുകയും വേതനം പുന:പരിശോധിക്കണമെന്ന് നിർദ്ദേശിക്കുകയും ചെയ്തു. 2018ൽ നഴ്സുമാരുടെ വേതനം നിശ്ചയിച്ചിരുന്നത് 50 കിടക്കകൾ വരെയുള്ള ആശുപത്രികളിൽ മിനിമം 20,000 രൂപയും പരമാവധി 30,000 രൂപയും എന്നാണ്. ഇത് മാനേജ്മെന്റിനും നഴ്സ് മാർക്കും സ്വീകാര്യമായിരുന്നില്ല. ഇതിനെതിരെ മാനേജ്മെന്റും സ്വകാര്യ നഴ്സുമാരും കോടതിയിൽ പ്രത്യേകം ഹർജി നൽകിയിരുന്നു.
ദിവസവേതനം 1500 രൂപയാക്കി വർദ്ധിപ്പിക്കണമെന്ന് ആവശ്യപ്പെട്ട് യുണൈറ്റഡ് നഴ്സസ് അസോസിയേഷൻ നേരത്തെ തന്നെ സമരം തുടങ്ങിയിരുന്നു. വിഷയവുമായി ബന്ധപ്പെട്ട് കൊച്ചിയിൽ ലേബർ കമ്മീഷണർ നേഴ്സുമാരുടെ സംഘടനപ്രതിനിധികളുമായി ചർച്ച നടത്തിയെങ്കിലും ചർച്ച പരാജയപ്പെട്ടതിനെ തുടർന്ന് തൃശ്ശൂരിൽ നഴ്സസ് അസോസിയേഷൻ സൂചന പണിമുടക്ക് നടത്തിയിരുന്നു.