തിരുവനന്തപുരം: ശബരിമല കോർഡിനേറ്റർ സ്ഥാനത്തുനിന്ന് എഡിജിപി അജിത് കുമാറിനെ നീക്കി സർക്കാർ. പകരം പൊലീസ് ഹെഡ് കോർട്ടേഴ്സിലെ എഡിജിപി എസ് ശ്രീജിത്തിനെ ചീഫ് കോർഡിനേറ്റർ ആയി നിയമിച്ചുകൊണ്ട് ഉത്തരവിറക്കി. അജിത് കുമാറിനെ ക്രമസമാധാന ചുമതലയിൽ നിന്ന് മാറ്റിയതിന് പിന്നാലെയാണിപ്പോൾ ശബരിമല കോ-ഓർഡിനേറ്റര് സ്ഥാനത്തു നിന്നു കൂടി മാറ്റുന്നത്.
ഈ വർഷത്തെ ശബരിമല തീർത്ഥാടനം ആരംഭിക്കാൻ ഇരിക്കെയാണ് പുതിയ തീരുമാനം. ശബരിമലയിലെ പൊലീസ് ഡ്യൂട്ടിയും ക്രമസമാധാനവും ഉൾപ്പെടെയുള്ള കാര്യങ്ങൾ ഏകോപിപ്പിക്കുന്നതിനായി പൊലീസ് ഹെഡ് ക്വാട്ടേഴ്സിലെ എഡിജിപിയെ നിയമിക്കുകയാണെന്നാണ് ഉത്തരവിലുള്ളത്. നേരത്തെ ക്രമസമാധാന ചുമതലയുണ്ടായിരുന്ന അജിത് കുമാറിനായിരുന്നു ശബരിമല ചീഫ് കോഡിനേറ്ററിന്റെ ചുമതലയും.