ലക്ഷദ്വീപിനെ പ്രധാന ടൂറിസ്റ്റ് കേന്ദ്രമാക്കുമെന്ന് കേന്ദ്ര ഇടക്കാല ബജറ്റില്‍ ധനമന്ത്രി നിര്‍മല സീതാരാമന്‍ പറഞ്ഞു. “ആഭ്യന്തര ടൂറിസത്തിൻ്റെ ആവശ്യകത പരിഹരിക്കുന്നതിനായി ലക്ഷദ്വീപ് ഉൾപ്പെടെയുള്ള ദ്വീപുകളിൽ തുറമുഖങ്ങൾ നിർമ്മിച്ച് അവയെ ബന്ധിപ്പിക്കുകയും ടൂറിസത്തിനായി അടിസ്ഥാന സൗകര്യമൊരുക്കുകയും ചെയ്യുമെന്നാണ് ധനമന്ത്രി ലോക്സഭയെ അഭിസംബോധന ചെയ്തുകൊണ്ട് പറഞ്ഞത്. ആത്മീയ ടൂറിസത്തിന് ഊന്നല്‍ നല്‍കിയായിരിക്കും ഇനിയുള്ള ടൂറിസം മേഖലയിലെ പ്രവര്‍ത്തനങ്ങള്‍. സംസ്ഥാനങ്ങള്‍ക്ക് ടൂറിസം രംഗത്ത് ദീര്‍ഘകാല വായ്പകള്‍ നല്‍കും. പ്രാദേശിക ടൂറിസം പ്രോത്സാഹിപ്പിക്കും. ടൂറിസം മേഖലയില്‍ വിദേശനിക്ഷേപം സ്വീകരിക്കുമെന്നും നിര്‍മല സീതാരാമന്‍ പറഞ്ഞു.
ടൂറിസം വികസനത്തെ ലോകനിലവാരത്തിലേക്ക് എത്തിക്കുകയാണ് ബജറ്റ് പ്രഖ്യാപനത്തിലൂടെ കേന്ദ്രം ലക്ഷ്യമിടുന്നത്. സംസ്ഥാനങ്ങള്‍ക്ക് ലോണുകള്‍ അനുവദിക്കുന്നതിലൂടെ പ്രാദേശിക ടൂറിസത്തെ പ്രോത്സാഹിപ്പിക്കും. ആത്മീയ ടൂറിസം പ്രാദേശിക സര്‍ക്കാരുകള്‍ക്ക് നേട്ടമാകുമെന്ന് കേന്ദ്രമന്ത്രി പറഞ്ഞു. വിനോദസഞ്ചാരത്തെക്കുറിച്ച് സംസാരിക്കുന്നതിനിടയിലാണ് ധനമന്ത്രി നിർമ്മല സീതാരാമൻ ലക്ഷദ്വീപിനെ കുറിച്ച് പരാമർശിച്ചത്. മാലിദ്വീപുമായുള്ള ഇന്ത്യയുടെ നയതന്ത്ര തർക്കത്തിനിടയിൽ വാർത്തകളിൽ നിറഞ്ഞു നിൽക്കുന്ന ലക്ഷദ്വീപ് ബജറ്റ് പരാമർശങ്ങളിൽ ഇടംപിടിക്കുമെന്ന് നേരത്തെ ഉറപ്പായിരുന്നു.
പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്രമന്ത്രിസഭ 2024ലെ ഇടക്കാല ബജറ്റിന് അംഗീകാരം നൽകി. പാർലമെൻ്റിൽ ഇടക്കാല ബജറ്റ് അവതരണത്തിന് മുന്നോടിയായുള്ള മന്ത്രിസഭാ യോഗമാണ് പ്രധാനമന്ത്രി മോദിയുടെ അധ്യക്ഷതയിൽ ചേർന്നത്. ഈ വർഷം ലോക്‌സഭാ തിരഞ്ഞെടുപ്പ് നടക്കാനിരിക്കെ, ധനമന്ത്രിയെന്ന നിലയിൽ സീതാരാമൻ്റെ ആറാമത്തെ ബജറ്റാണിത്. മോദി സർക്കാരിൻ്റെ രണ്ടാം ടേമിലെ അവസാന ബജറ്റുമാണിത്.