ഗവർണ്ണർ വിവാദ വിഷയത്തിൽ സർക്കാരിനും ഗവർണ്ണർക്കും ഉത്തരവാദിത്വമുണ്ടെന്നും, സർവകലാശാലകൾ സ്തംഭിക്കുകയും വിദ്യാർഥികളുടെ ഭാവി ആശങ്കയിലായെന്നും എം എം ഹസ്സന് പറഞ്ഞു. ഗവർണറുടെ നയപ്രഖ്യാപന പ്രസംഗം ഒഴിവാക്കാൻ കേരള സർക്കാർ ശ്രമിക്കുന്നു, അത് ഭരണഘടനാപരമായ അവകാശമല്ലേ എന്നും ദുബായില് വാര്ത്താസമ്മേളനത്തില് എം എം ഹസ്സൻ ചോദിച്ചു. കണ്ണൂര് സര്വകലാശാല വൈസ് ചാന്സലറുടെ നിയമനത്തോടെ സംസ്ഥാന സര്ക്കാര് തന്നെയാണ് ഗവര്ണര്ക്ക് ഇത്തരം വിമര്ശനങ്ങള് ഉന്നയിക്കാന് വഴിയൊരുക്കി കൊടുത്തത്. കേരളം കടക്കെണിയിൽ ആയിരിക്കുക്കുമ്പോഴും മന്ത്രിമാർ വിദേശപര്യടനം നടത്തി ധൂർത്ത് തുടരുന്നു. പ്രവാസി വിഷയത്തിൽ പിണറായി സർക്കാർ നോക്കുക്കുത്തിയാണെന്നും എം എം ഹസ്സൻ ആരോപിച്ചു. ഇന്ത്യയിലേക്ക് പോകാൻ ഇപ്പോഴും എയർസുവിധ രജിസ്റ്റർ നടപടി തുടരാൻ പാടില്ലാത്തതാണെന്നും കോവിഡ് സമയത്ത് തുടങ്ങിയ എയർസുവിധ നടപടി പിൻവലിക്കണം എന്നും അദ്ദേഹം ആവശ്യപ്പെട്ടു.
കെ സുധാകരൻ വിവാദം അടഞ്ഞ അധ്യായമാണെന്ന് എം എം ഹസ്സൻ വ്യക്തമാക്കി. സുധാകരന്റേതു നാക്കുപിഴ മാത്രമാണ്. അതിൽ അദ്ദേഹം ഖേദം പ്രകടിപ്പിച്ചതോടെ വിഷയം അവസാനിച്ചു. വിലക്കയറ്റം ധൂർത്ത് തുടങ്ങിയ സർക്കാരിന്റെ ജനവിരുദ്ധ നയങ്ങൾക്കെതിരെ യുഡിഫ് അടുത്ത മാസം തുടർപ്രക്ഷോഭത്തിലേക്ക് നീങ്ങുമെന്നും എം എം ഹസ്സൻ ദുബൈയിൽ മാധ്യമപ്രവർത്തകരോട് പറഞ്ഞു.