ദുബൈ: ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് ദുബൈ (ജിഡിആർഎഫ്എഡി) അടുത്തിടെ പുറത്തിറക്കിയ സ്മാർട്ട് അപ്ലിക്കേഷന് മികച്ച സ്വീകാര്യത. സേവന കേന്ദ്രങ്ങളോ എമിഗ്രേഷൻ ഓഫീസോ സന്ദർശിക്കാതെതന്നെ ഉപയോക്താക്കൾക്ക് അതിവേഗം വീസാ സേവനങ്ങൾ ലഭ്യമാക്കികൊണ്ടാണ് ആപ്പ് ശ്രദ്ധേയമാകുന്നത്. പുതിയ വീസാ എടുക്കാനും പുതുക്കാനും ഈ അപ്ലിക്കേഷൻ വഴി സാധിക്കുന്നതാണ്. ഒപ്പം ന്യൂ എൻട്രി പെർമിറ്റ് റസിഡൻസി, നവജാത ശിശുകൾക്കുള്ള റസിഡൻസ് വീസ തുടങ്ങിയവയ്ക്ക് അപേക്ഷിക്കാനും കഴിയും. കൂടാതെ, വിവിധ വീസ ലംഘനങ്ങളുടെ- പേരിലുള്ള പിഴകളും അടക്കുവാനും ആപ്പിലൂടെ കഴിയുന്നതാണെന്ന് അധികൃതർ അറിയിച്ചു
ആപ്പ് സ്റ്റോറിൽ നിന്നും പ്ലേസ്റ്റോറിൽ നിന്നും GDRFA DXB എന്ന് സേർച്ച് ചെയ്താൽ ഇത് ഇൻസ്റ്റാൾ ചെയ്യാവുന്നതാണ്.മുൻപുള്ള ജിഡിആർഎഫ്എയുടെ സ്മാർട്ട് അപ്ലിക്കേഷനോക്കാൾ പതിന്മടങ്ങ് വേഗത്തിൽ ഉപയോക്താക്കൾക്കു സേവനങ്ങൾ നൽകാൻ പുതിയ ആപ്പിന് സാധിക്കുമെന്നും ഉപയോക്താക്കളുടെ സമയവും അധ്വാനവും സംരക്ഷിച്ച് മികച്ച സേവനങ്ങൾ നൽകാനും ഈ മൊബൈൽ അപ്ലിക്കേഷൻ വഴി സാധിക്കുമെന്ന് എമിഗ്രേഷൻ തലവൻ ലഫ്. ജനറൽ മുഹമ്മദ് അഹ്മദ് അൽ മർറി അറിയിച്ചു. ഈ വർഷത്തെ ജൈറ്റ്ക്സ് സാങ്കേതികവാരത്തിലാണ് ജിഡിഡിആർഎഫ്എ പുതിയ സ്മാർട്ട് ആപ്പ് അവതരിപ്പിച്ചത്