സുസ്ഥിരമായ ജീവിത ആശയങ്ങൾക്ക് പ്രാധാന്യം നൽകിക്കൊണ്ടും പുനരുപയോഗത്തെ പ്രോത്സാഹിപ്പിച്ചും കുട്ടികൾ സർഗ്ഗാത്മകതയിൽ മുഴുകുകയാണ്. ഇത് തെളിയിക്കുന്നതാണ് ഷാർജ ചിൽഡ്രൻസ് റീഡിംഗ് ഫെസ്റ്റിവലിൻ്റെ പതിനഞ്ചാമത് എഡിഷനിൽ കൊച്ചുകുട്ടികൾ പുനരുപയോഗ പേപ്പറിൽ നിന്ന് ആകർഷകമായ പുഷ്പ വിളക്കുകൾ നിർമ്മിക്കുന്നത്.
അധ്യാപികയായ വലേരിയ ലോട്ടോറിയേവയുടെ നിർദ്ദേശങ്ങൾ അനുസരിച്ച് കുരുന്നു കലാകാരന്മാർ അവർക്കു നൽകിയ പേപ്പറിൽ നിന്ന് ആറ് ഇതളുകൾ വീതം വെട്ടിയെടുത്ത് ഫില്ലർ ഉപയോഗിച്ച് വാട്ടർ കളർ ഒഴിച്ച് ബ്രഷ് ഉപയോഗിച്ച് പെയിൻ്റ് ചെയ്ത ഒന്നിനു മുകളിൽ ഒന്നായി ഒട്ടിച്ച് ഭാവനയുടെ ലോകം തുറന്നു.
“കുട്ടികൾക്ക് അവരുടെ മുറികൾ അലങ്കരിക്കാൻ ഇത് ഉപയോഗിക്കാം, അവർ അത് വിളക്കിന് താഴെ വെച്ചാൽ അത് തിളങ്ങുന്ന പൂന്തോട്ടത്തിൻ്റെ പ്രതീതി നൽകും. പരിസ്ഥിതിയെക്കുറിച്ചും സാധ്യമാകുമ്പോഴെല്ലാം പുനരുപയോഗം ചെയ്യേണ്ടതിൻ്റെ ആവശ്യകതയെക്കുറിച്ചും അവരുടെ അവബോധം വളർത്തുന്നതിനാണ് ഈ പ്രവർത്തനം”ഉക്രെയ്നിൽ നിന്നുള്ള ഡിസൈനർ കൂടിയായ ലോട്ടോറിയേവ പറഞ്ഞു.
“വൺസ് അപ്പോൺ എ ഹീറോ” എന്ന പ്രമേയത്തിൽ നടക്കുന്ന ഷാർജ കുട്ടികളുടെ വായനോത്സവം, വായന കൂടാതെ നാടകങ്ങൾ, പാചക പ്രദർശനങ്ങൾ, വർക്ക്ഷോപ്പുകൾ, സോഷ്യൽ മീഡിയ, സംഗീതം, കൂടാതെ നിരവധി ആവേശകരമായ മത്സരങ്ങൾ, പ്രവർത്തനങ്ങൾ, ആനിമേഷൻ ഇവന്റുകൾ എന്നിവയെല്ലാം കുട്ടികളുടെ വായനോത്സവത്തിൽ അരങ്ങേറുന്നുണ്ട്. 20 രാജ്യങ്ങളിൽ നിന്ന് 186 പ്രസാധകരുടെ പങ്കാളിത്തത്തോടൊപ്പം 25 രാജ്യങ്ങളെ പ്രതിനിധീകരിച്ച് 265 അതിഥികൾ നയിക്കുന്ന 1,500-ലധികം സാംസ്കാരിക, സർഗ്ഗാത്മക, വിദ്യാഭ്യാസ പ്രവർത്തനങ്ങളുടെ വൈവിധ്യമാർന്ന പരിപാടികളും അവതരിപ്പിക്കും. കുട്ടികളുടെ വായനോത്സവം ഈ മാസം 12ന് അവസാനിക്കും.