ആസാ ഗ്രൂപ്പ് തൊഴിലാളികൾക്കായി ലേബർ ക്യാമ്പിൽ ഇഫ്താർ സംഗമം നടത്തി. ദുബൈ വർസാൻ ക്യാമ്പ്, അജ്മാൻ ആസ ക്യാമ്പ്, ജബൽ അലിയിലെ രണ്ടു ലേബർ ക്യാമ്പുകൾ എന്നിവിടങ്ങളിലായി പതിനായിരത്തോളം വരുന്ന തൊഴിലാളികൾക്കായാണ് ഇഫ്താർ നടത്തിയത്. മാർച്ച് 7,8,9 തിയ്യതികളിൽ ആണ് ഇഫ്താർ സംഗമം നടന്നത്. ഇഫ്താർ സംഗമങ്ങളിൽ തൃശ്ശൂർ എം പി ടി എൻ പ്രതാപൻ മുഖ്യ അതിഥി ആയിരുന്നു.
പന്ത്രണ്ടിൽപരം വിവിധ രാജ്യക്കാരായ തൊഴിലാളികളുമായും, ഇന്ത്യയിലെ വിവിധ സംസ്ഥാനങ്ങളിൽ നിന്നുള്ള തൊഴിലാളികളുമായും അടുത്ത് ഇടപഴകുവാനും, സംവാദിക്കുവാനും സാധിച്ചത് തൻ്റെ ജീവിതത്തിലെ മറക്കാനാവാത്ത അനുഭവം ആയിരുന്നുവെന്ന് ടി എൻ പ്രതാപൻ പറഞ്ഞു. പതിമൂന്ന് വയസ്സ് തുടങ്ങി ഇതുവരെ ഓണം വിഷു ദിവസങ്ങൾ വന്നാൽ അതൊഴിച്ച് റംസാൻ മാസത്തിലെ എല്ലാ നോമ്പും ഒരു മുടക്കവും കൂടാതെ താൻ അനുഷ്ഠിച്ചുവരുന്നു എന്നും തൊഴിലാളികളുമായി സംവദിക്കവേ അദ്ദേഹം പറഞ്ഞു. പതിനായിരത്തോളം വരുന്ന വിവിധ രാജ്യക്കാരായ തൊഴിലാളികൾക്ക് ജോലി നൽകുന്നതിലൂടെ ലക്ഷകണക്കിന് ആളുകൾക്കാണ് സി പി സാലിഹ് അദ്ദേഹത്തിൻ്റെ ആസ ഗ്രൂപ്പിലൂടെ താങ്ങും തണലും ആവുന്നത് എന്ന് അദ്ദേഹം പറഞ്ഞു.
വർഷങ്ങളായി തുടർന്ന് വന്നിരുന്ന ഇഫ്താർ സംഗമങ്ങൾ കോവിഡ് മഹാമാരിയെ തുടർന്ന് ഉപേക്ഷിക്കേണ്ടി വന്നിരുന്നു എന്ന് ആസാ ഗ്രൂപ്പ് സിഎംഡി സി പി സാലിഹ് ഓർമിപ്പിച്ചു. തൻ്റെ കുടുംബാംഗങ്ങളോട് കൂടെ തൊഴിലാളികൾക്കൊപ്പം നോമ്പ് തുറക്കാൻ സാധിച്ചതിൽ സന്തോഷവാനാണെന്നും സാലിഹ് പറഞ്ഞു. അഡ്വക്കേറ്റ് ഓണംപിള്ളി മുഹമ്മദ് ഫൈസി വിവിധ ഭാഷകളിൽ റംസാൻ സന്ദേശം നൽകി. മത സൗഹാർദ്ദത്തിലും, സഹിഷ്ണുതയിലും ഊന്നിയുള്ള വിശ്വാസപ്രമാണങ്ങൾ ആണ് എല്ലാ മതങ്ങളും ഉൽഘോഷിക്കുന്നത് എന്നും അദ്ദേഹം കൂട്ടിച്ചേർത്തു.
മാർച്ച് 7 വെള്ളിയാഴ്ച അജ്മാൻ പോലീസ് ക്ലബ്ബിൽ നടന്ന കമാൻഡർ ഇൻ ചീഫ് കപ്പിനായുള്ള അജ്മാൻ പോലീസ് ഫുട്ബോൾ ഫൈനൽ മത്സരത്തിലും മുഖ്യാതിഥിയായി ടി.എൻ.പ്രതാപൻ എം.പി പങ്കെടുത്തിരുന്നു. അജ്മാൻ പോലീസിന്റെ കമാൻഡർ ഇൻ ചീഫും ഭരണകുടുംബാംഗവുമായ ഷെയ്ഖ് സുൽത്താൻ ബിൻ അബ്ദുല്ല അൽ നുഐമിയും, ആസാ ഗ്രൂപ്പ് സിഎംഡിയും CP മുഹമ്മദ് മെമ്മോറിയൽ ചാരിറ്റബിൾ ട്രസ്റ്റ് ചെയർമാനുമായ സി പി സാലിഹ് എന്നിവരും പങ്കെടുത്തു.