ഷാര്ജ: ഹാസ്യമായാലും കഥാചിത്രമായാലും സിനിമയെ ഗൗരവത്തോടെ സമീപിക്കുന്നവരാണ് മലയാളി സമൂഹമെന്ന് സിനിമാ താരം ജയസൂര്യ പറഞ്ഞു. സിനിമയില് എന്തെങ്കിലും കാണിച്ച് മലയാളി പ്രേക്ഷകരെ കബളിപ്പിക്കാനാവില്ല. 41-ാമത് ഷാര്ജ രാജ്യാന്തര പുസ്തകോത്സവത്തില് സിനിമാ പ്രേക്ഷകരുമായി സംവദിക്കുകയായിരുന്നു അദ്ദേഹം. മറ്റു ഭാഷാ ചിത്രങ്ങളില് കാണുന്ന തരത്തില് അതിഭാവുകത്വമുള്ള നായകന്മാരെയോ വില്ലന്മാരെയോ മലയാളത്തില് അംഗീകരിക്കില്ല. ഓരോ സിനിമയുടെയും കഥാസന്ദര്ഭവും ക്യാമറയും എഡിറ്റിംഗും വരെ മലയാള പ്രേക്ഷകര് വിലയിരുത്താറുണ്ട്. ഈഗോ ഇല്ലാത്ത നല്ല കൂട്ടുകെട്ടില് നിന്നും സൗഹൃദത്തില് നിന്നുമാണ് പലപ്പോഴും മികച്ച സിനിമകള് പിറക്കുന്നത്. മലയാളത്തില് മിക്കവാറും സൂപ്പര്ഹിറ്റ് ചിത്രങ്ങളുണ്ടായിട്ടുള്ളത് മികച്ച സൗഹൃദത്തില് നിന്നാണ്. വെള്ളം പോലുള്ള ജീവിതഗന്ധിയായ സിനിമയിലെ കഥാപാത്രം ചെയ്തപ്പോള് വേറിട്ട അനുഭവമാണുണ്ടായത്. വെള്ളത്തിലെ മുരളിയെ അവതരിപ്പിച്ചത് അദ്ദേഹത്തെ മറ്റുള്ളവരില് നിന്നും കേട്ടറിഞ്ഞാണ്. ഈ കഥാപാത്രം നിരവധി പേര്ക്ക് പ്രചോദനമായെന്നറിഞ്ഞപ്പോള് സിനിമാജീവിതത്തില് മറക്കാനാവാത്ത അനുഭവമായി എന്നും ജയസൂര്യ കൂട്ടിച്ചേർത്തു. അവതരിപ്പിച്ച നല്ല കഥാപാത്രങ്ങളുടെ അംശം ജീവിതത്തില് നിന്നും ഇറക്കിവിടാന് കഴിയില്ല. ഫുട്ബോള് താരം സത്യനെ അവതരിപ്പിച്ചതും അങ്ങനെ തന്നെ. ഇതെല്ലാം ദൈവാനുഗ്രഹമായാണ് താന് കാണുന്നതെന്നും ജയസൂര്യ പറഞ്ഞു.
ലോകമറിയേണ്ട കഥാപാത്രങ്ങള് നമുക്കിടയില് ജീവിക്കുന്നുണ്ട്. പ്രവാസ ലോകത്ത് വേറിട്ട സേവനപ്രവര്ത്തനത്തില് ഏര്പ്പെട്ടിരിക്കുന്ന അഷ്റഫ് താമരശ്ശേരിയുടെ കഥാപാത്രം ആരെങ്കിലും അവതരിപ്പിക്കണം. മലയാള സിനിമ താമസിയാതെ തന്നെ കോമഡിയിലേക്ക് മാറുമെന്നും തന്റെ അടുത്ത ചിത്രം കോമഡിയായിരിക്കുമെന്നും അദ്ദേഹം പറഞ്ഞു. ചിരിക്കാനും ആസ്വദിക്കാനുമുള്ള സിനിമകള് ഇഷ്ടപ്പെടുന്നവരാണ് കൂടുതലും. കത്തനാര് എന്ന സിനിമക്ക് ശേഷം ഹാസ്യ ചിത്രത്തില് അഭിനയിക്കും. ആട് എന്ന സിനിമയുടെ മൂന്നാം ഭാഗവും വരുന്നുണ്ടെന്ന് ജയസൂര്യ പറഞ്ഞു. ജയസൂര്യക്ക് മികച്ച നടനുള്ള അവാര്ഡുകള് സമ്മാനിച്ച ക്യാപ്റ്റന്, വെള്ളം തുടങ്ങിയ സിനിമകളുടെ സംവിധായകന് പ്രജേഷ് സെന്നും ഒപ്പമുണ്ടായിരുന്നു.