യുഎന്നുമായി ബന്ധപ്പെട്ട അറബ് മീഡിയ യൂണിയനിൽ അംഗത്വം നേടിയ ആദ്യ എമിറാത്തി വനിതാ മാധ്യമപ്രവർത്തകയായി നജ്ല അൽദൂഖി. ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജിഡിആർഎഫ്എ) യുടെ മാർക്കറ്റിംഗ് ആൻഡ് ഗവൺമെന്റ് കമ്മ്യൂണിക്കേഷൻ ഡയറക്ടറായി പ്രവർത്തിക്കുന്ന നജ്ലയ്ക്ക് സ്ഥാപനത്തിന് നൽകിയ വിലപ്പെട്ട സംഭാവനകൾ പരിഗണിച്ചാണ് ഈ അംഗീകാരം ലഭിച്ചത്. ജിഡിആർഎഫ്എ യുടെ മേധാവി ലെഫ്റ്റനന്റ് ജനറൽ മുഹമ്മദ് അഹ്മദ് അൽ മർറിയാണ് നജ്ലയെ ഈ അംഗത്വത്തിന് നാമനിർദ്ദേശം ചെയ്തത്.
ദുബായിലെ താമസ-കുടിയേറ്റ ഓഫീസിൽ നടന്ന ചടങ്ങിൽ, ലെഫ്റ്റനന്റ് ജനറൽ അൽ മർറിയുടെ സാന്നിധ്യത്തിൽ, നജ്ല അൽദൂഖിയ്ക്ക് അംഗത്വ കാർഡ് കൈമാറി. ഈ സന്ദർഭത്തിൽ, യുഎന്നുമായി ബന്ധപ്പെട്ട അറബ് മീഡിയ യൂണിയനും അറബ് ക്രിയേറ്റേഴ്സ് യൂണിയനും നേതൃത്വം വഹിക്കുന്ന ഡോ. അഹ്മദ് നൂർ, നജ്ലയുടെ ഈ നേട്ടം എമിറാത്തി മാധ്യമ മേഖലയിലെ ഉയർച്ചയ്ക്കും അന്താരാഷ്ട്ര തലത്തിൽ രാജ്യത്തിന്റെ പ്രതാപം വർദ്ധിപ്പിക്കുന്നതിനും വലിയ പങ്ക് വഹിക്കുമെന്ന് അഭിപ്രായപ്പെട്ടു.
ലെഫ്റ്റനന്റ് ജനറൽ അൽ മർറി, നജ്ലയുടെ സർക്കാർ കമ്മ്യൂണിക്കേഷൻ, മാർക്കറ്റിംഗ്, സ്ഥാപന പ്രതിഷ്ഠ എന്നിവയുടെ ദിശാബോധം മെച്ചപ്പെടുത്തുന്നതിലെ നിർണായക പങ്കാണ് ഈ അംഗീകാരത്തിന് കാരണമായതെന്ന് പറഞ്ഞു. സർക്കാർ സേവനങ്ങളുടെ നിലവാരം ഉയർത്തുന്നതിലും ദുബായിയുടെ ആഗോള പ്രതിച്ഛായം മെച്ചപ്പെടുത്തുന്നതിലും നജ്ല നടത്തിയ ശ്രമങ്ങൾ നിർണായകമാണെന്നും അദ്ദേഹം ചൂണ്ടിക്കാട്ടി.
ഈ അഭിമാനകരമായ നേട്ടത്തിന് തന്നെ നാമനിർദ്ദേശം ചെയ്തതിന് ലെഫ്റ്റനന്റ് ജനറൽ അൽ മർറിയ്ക്ക് നജ്ല അൽദൂഖി നന്ദി അറിയിച്ചു. “ജനറൽ ഡയറക്ടറേറ്റിന്റെ ശക്തമായ പിന്തുണയും മാർഗനിർദ്ദേശവും ഇല്ലാതെ ഈ നേട്ടം കൈവരിക്കാൻ സാധിക്കില്ല. കൂട്ടായ ശ്രമങ്ങളും സഹകരണവുമാണ് വിജയത്തിലേക്ക് നയിക്കുന്നത്,” എന്ന് നജ്ല പ്രതികരിച്ചു. എമിറാത്തി മാധ്യമ രംഗം ആഗോള തലത്തിൽ കൂടുതൽ ഉയർത്തിപിടിക്കാനുള്ള തന്റെ പ്രതിബദ്ധത തുടരുമെന്നും അവർ അറിയിച്ചു.
നജ്ല അൽദൂഖിയുടെ ഈ നേട്ടം എമിറാത്തി മാധ്യമ മേഖലയിലും സർക്കാർ കമ്മ്യൂണിക്കേഷനിലും ഒരു പുതിയ അദ്ധ്യായമായി മാറുന്നതോടൊപ്പം, ആഗോള തലത്തിൽ എമിറാത്തി വനിതകളുടെ സ്വാധീനം കൂടുതൽ ശക്തിപ്പെടുത്തുന്നതിൽ പ്രധാനപ്പെട്ട ഒരു ഘട്ടമാകുമെന്ന് പ്രതീക്ഷിക്കുന്നു.