യുഎഇ എന്ന യുണൈറ്റഡ് അറബ് എമിറേറ്റ്സ് 53ാം പിറന്നാൾ ആഘോഷിക്കുകയാണ്. 1971 ഡിസംബർ 2ന് ട്രൂഷൽ സ്റ്റേട്സിൽ നിന്ന് മാറി അബുദാബി, ദുബായ്, ഷാർജ, അജ്മാൻ, ഉമ്മുൽഖുവൈൻ, ഫുജൈറ എന്നീ 6 പ്രവിശ്യകളും 1972 ഫെബ്രുവരി 10ന് റാസൽഖൈമയും ചേർന്ന് യുണൈറ്റഡ് അറബ് എമിറേറ്റ്സ്എന്ന ഒറ്റ രാജ്യം രൂപീകരിച്ചിട്ട് 53 വർഷം. പിന്നീട് ദ്രുതഗതിയിൽ ഉള്ള വളർച്ച നേടിയ രാജ്യമായി യു എ ഇ. ഇന്ന് ലോകം വിസ്മയിക്കുന്ന ഉയരങ്ങളിലേക്ക് ഈ നാട് കുതിക്കുകയാണ്. 200 ൽ അധികം രാജ്യങ്ങളിൽ നിന്നുള്ളവർ ഇന്ന് യു എ ഇ യിൽ വസിക്കുന്നുണ്ട്. രാജ്യത്തുടനീളം വലിയ രീതിയിലുള്ള ആഘോഷ പരിപാടികളാണ് സർക്കാർ തലത്തിലും സ്വകാര്യ മേഖലകളിലും ആസൂത്രണം ചെയ്തിരിക്കുന്നത്.
ദുബായ് ഗ്ലോബൽ വിലജിലും ഗംഭീര പരിപാടികളാണ് നടക്കുന്നത്. ദേശീയദിനത്തോടനുബനധിച്ച് ദുബായ് ഗ്ലോബൽവില്ലേജും രാജ്യത്തിന്റെ ചതുർ വർണ്ണ പതാകയുടെ നിറങ്ങളാൽ ജ്വലിച്ചുനില്കുന്നു. ഗ്ലോബൽ വില്ലേജിന്റെ പ്രധാന സ്റ്റേജിൽ ദേശീയ ദിനത്തോടനുബന്ധിച്ച് ഹവാ എമിറാത്തി എന്ന പേരിൽ പ്രത്യേകനൃത്ത സംഗീത പരിപാടിയും അരങ്ങേറി. രാഷ്ട്രത്തിൻ്റെ പൈതൃകം പ്രദർശിപ്പിക്കുന്ന പുതുമയുള്ളതും സർഗ്ഗാത്മകവുമായ എമിറാത്തി കവിതകളും ഗാനങ്ങളും നൃത്തങ്ങളും സമന്വയിപ്പിച്ചാണ് ഹവാ എമിറാത്തി അരങ്ങേറിയത്.
യു എ ഇ യുടെ ഭൂതകാലവും സമ്പന്നമായ സംസ്കാരവും എടുത്തുകാട്ടുന്നതായിരുന്നു ഈ നൃത്ത സംഗീത ശിൽപം. 1960 കളിൽ ജീവിച്ചിരുന്ന വധൂവരന്മാരെ കേന്ദ്രീകരിച്ചാണ് നൃത്തശില്പം ഒരുക്കിയിരിക്കുന്നത്. ഒരു ചെറുപ്പക്കാരന്റെ ജീവിതത്തിലൂടെ സഞ്ചരിച്ചുകൊണ്ട് കഥ മുന്നോട്ടുപോവുന്നു. സുഹൃത്തുക്കളോടൊപ്പം മുഹുവാരം കടലിൽ പോവുന്നതിനിടയിൽ സുന്ദരിയായ പെൺകുട്ടിയെ കാണുന്നതും പ്രണയവും തുടർന്ന് അത് വിവാഹനിശ്ചയത്തിലേക്കും നയിക്കുന്നതും എല്ലാമാണ് ഇതിവൃത്തം.
പരമ്പരാഗത ആചാരങ്ങളും സംഗീതവും എല്ലാമായി ആ കാലഘട്ടത്തിലെ ദുബായുടെ ഊർജ്ജസ്വലമായ പൈതൃകവും അടയാളപ്പെടുത്തി സന്തോഷകരമായ ഒരു വിവാഹ ആഘോഷം.. തുടന്ന് യു എ ഇ യുടെ സ്ഥാപകരായ ഹിസ് ഹൈനസ് ഷെയ്ഖ് സായിദ് ബിൻ സുൽത്താൻ അൽ നഹ്യാൻ്റെയും ഹിസ് ഹൈനസ് ഷെയ്ഖ് റാഷിദ് ബിൻ സയ്യിദ് അൽ മക്തൂമിൻ്റെയും നേതൃത്വത്തിൽ 1971- യുണൈറ്റഡ് അറബ് എമിറേറ്റ്സ് രൂപം കൊള്ളുന്നതിനു സാക്ഷികളാകുന്ന രീതിയിലാണ് ഈ സംഗീത ശിൽപം അവസാനിക്കുന്നത്. ഭൂതകാലവും വർത്തമാനവും തമ്മിലുള്ള ആഴത്തിലുള്ള ബന്ധത്തെ ഊന്നിപ്പറയുന്നതായിരുന്നു ഹവാ എമിറാത്തി എന്ന സംഗീത നൃത്ത ശില്പം
ഇസ്മായിൽ അബ്ദുള്ള തിരക്കഥയെഴുതി, നാസർ ഇബ്രാഹിം സംവിധാനം നിർവ്വഹിച്ച് മുഹമ്മദ് ഹബ്ബാസച്ചിന്റെ സംഗീത സംവിധാനത്തിലൂടെ അരങ്ങത്തെത്തിയ ഹവാ എമിറാത്തി ഏറെ ശ്രദ്ധ പിടിച്ചുപറ്റി. 40 ഓളം പേരാണ് ഇതിൽ പങ്കെടുത്തതെന്നും, ഗ്ലോബൽ വില്ലേജിലെ ആഘോഷങ്ങൾക്ക് മാത്രമായാണ് ഈ നൃത്ത സംഗീത ശില്പം ഒരുക്കിയതെന്നും അധികൃതർ വ്യ്കതമാക്കി.