രാഹുൽ മാങ്കൂട്ടത്തിലിന്റെത് പാലക്കാടിന്റെ രാഷ്ട്രീയ മതേതരത്വ വിജയമാണെന്ന് ഷാഫി പറമ്പിൽ എംപി. ടിവിയിലെ കൊടുങ്കാറ്റല്ല വോട്ടെണ്ണുന്ന 23ന് കാണുകയെന്ന് നേരത്തെ പറഞ്ഞിരുന്നെന്നും അത് ശരിയെന്ന് തെളിഞ്ഞുവെന്നും മാധ്യമങ്ങളെ കണ്ട ഷാഫി പ്രതികരിച്ചു.
“ബിജെപിയെ പാലക്കാട് നിന്നും മാറ്റാൻ ജനം തീരുമാനിച്ച് കഴിഞ്ഞു. പാലക്കാട്ടെ സിപിഎം-ബിജെപിയുടെ സിജെപി മുന്നണി പരാജയപ്പെട്ടുവെന്നാണ് പറയണ്ടത്. വടകരയിലെ കാഫിർ വിവാദവും, പാലക്കാട്ടെ പത്ര പരസ്യവിവാദവും ഓർക്കണം. സിപിഎം വർഗീയത പറയുന്നത് നിർത്തണം” ഷാഫി പറമ്പിൽ പറഞ്ഞു.
ഉപതിരഞ്ഞെടുപ്പ് ഫലം കേരളത്തെ സംബന്ധിച്ച് ഒരു രാഷ്ട്രീയമാറ്റവും ഉണ്ടാക്കുന്നതല്ലെന്ന് ബിജെപി സംസ്ഥാന പ്രസിഡന്റ് കെ. സുരേന്ദ്രന്. ഉപതിരഞ്ഞെടുപ്പുകളിൽ ബി ജെ പിക്ക് വോട്ടു കുറയുന്നത് സ്വാഭാവിക പ്രതിഭാസമാണെന്നും കെ സുരേന്ദ്രൻ പറഞ്ഞു. യുഡിഎഫ് ജയിച്ചാലും എല്ഡിഎഫ് ജയിച്ചാലും സംസ്ഥാനത്ത് ഭരണമാറ്റമോ പുതിയ സംഭവവികാസങ്ങളോ ഉണ്ടാകില്ലെന്നും കെ സുരേന്ദ്രൻ പറഞ്ഞു. തിരഞ്ഞെടുപ്പില് എങ്ങനെയാണ് പാര്ട്ടിക്ക് വോട്ട് കുറഞ്ഞതെന്ന് പരിശോധിക്കുമെന്നും അദ്ദേഹം മാധ്യമങ്ങളോട് പറഞ്ഞു.
‘ഈ ഉപതിരഞ്ഞെടുപ്പ് ഫലം കേരളത്തെ സംബന്ധിച്ച് ഒരു രാഷ്ട്രീയമാറ്റവും ഉണ്ടാക്കുന്നതല്ല. ഈ ഉപതിരഞ്ഞെടുപ്പില് യുഡിഎഫ് ജയിച്ചാലും എല്ഡിഎഫ് ജയിച്ചാലും ഇവിടെ ഭരണമാറ്റമോ പുതിയ സംഭവവികാസങ്ങളോ ഉണ്ടാകുന്നില്ല. വയനാട്ടില് പ്രിയങ്ക ഗാന്ധിജി വന് ഭൂരിപക്ഷത്തോടെ വിജയിച്ചു എന്നുള്ളത് സംസ്ഥാനരാഷ്ട്രീയത്തില് എന്തെങ്കിലും ഒരു മാറ്റത്തിന് കാരണമാകുന്ന ഫലമല്ല. കഴിഞ്ഞ 20 വര്ഷത്തോളമായി സിപിഎം കൈവശംവെക്കുന്ന ചേലക്കര മണ്ഡലത്തിൽ അവര് തന്നെ ജയിച്ചു.കഴിഞ്ഞ 15 വര്ഷമായി യുഡിഎഫ് കൈവശംവെക്കുന്ന പാലക്കാട് മണ്ഡലം അവര് നിലനിര്ത്തി.” ഇതൊന്നും ഒരു വലിയ പ്രത്യേകതയായി കണക്കാക്കേണ്ട ആവശ്യമില്ലെന്നും സുരേന്ദ്രന് പറഞ്ഞു.
പാലക്കാട് ബിജെപി വിജയം പ്രതീക്ഷിച്ചാണ് മത്സരിച്ചതെന്നും പാലക്കാട് മൂന്ന്-നാലായിരം വോട്ടുകളുടെ കുറവ് എങ്ങനെ ഉണ്ടായി എന്നതിനേക്കുറിച്ച് വിശദമായി പരിശോധിക്കുമെന്നും പറഞ്ഞ അദ്ദേഹം. ശരിയായ നിലയില് ജനങ്ങളെ സമീപിച്ച് തദ്ദേശതിരഞ്ഞെടുപ്പിനും നിയമസഭാതിരഞ്ഞെടുപ്പിനും മുമ്പ് ആവശ്യമായ പ്രവര്ത്തനങ്ങള് നടത്തി ജനപിന്തുണ ആര്ജിക്കാന് പരിശ്രമിക്കുമെന്നും കൂട്ടിച്ചേര്ത്തു.
സംസ്ഥാനത്തെ ഉപതിരഞ്ഞെടുപ്പുകളുടെ ഫലം പരിശോധിച്ചാല് നെയ്യാറ്റിന്കരയിലും അരുവിക്കരയിലുമൊഴിച്ച് സംസ്ഥാനത്ത് നടന്ന മറ്റെല്ലാ ഉപതിരഞ്ഞെടുപ്പുകളിലും എന്ഡിഎക്ക് വോട്ടുകള് കുറയുകയാണുണ്ടായത്. വട്ടിയൂര്ക്കാവില് കുമ്മനം രാജശേഖരന് മത്സരിച്ചപ്പോള് 55000 വേട്ടുകള് കിട്ടി. പക്ഷേ അവിടെ പിന്നീട് നടന്ന ഉപതിരഞ്ഞെടുപ്പില് 27000 വോട്ടുകളാണ് ലഭിച്ചത്. ഒ രാജഗോപാലിന് രണ്ട് ലക്ഷത്തി മുപ്പത്തി അയ്യായിരം വോട്ട് ലഭിച്ചപ്പോള് തൊട്ടടുത്ത് നടന്ന ലോക് സഭാ തിരഞ്ഞെടുപ്പില് വെറും 35000 വോട്ടുകളാണ് ലഭിച്ചത്. സംസ്ഥാനത്തെ ഉപതിരഞ്ഞെടുപ്പുകളുടെ ചരിത്രം നോക്കിയാല് എല്ലാഘട്ടങ്ങളിലും അത് അങ്ങനെയാണ്. അതുകൊണ്ട് ഈ ഉപതിരഞ്ഞെടുപ്പിന്റെ പരിണാമം വലിയ ആഘോഷമാക്കി ചിലര് ചിത്രീകരിക്കാന് ശ്രമിക്കുന്നത് വസ്തുതകളുമായി യോജിക്കുന്നതല്ല-സുരേന്ദ്രന് വ്യക്തമാക്കി.