അടുത്ത ഏഴ് ദിവസത്തിനുള്ളില്‍ ഇന്ത്യയിലുടനീളം പൗരത്വ ഭേദഗതി നിയമം നടപ്പാക്കുമെന്ന് കേന്ദ്രമന്ത്രി ശന്തനു താക്കൂര്‍. കേന്ദ്ര ആഭ്യന്തര മന്ത്രി അമിത് ഷായുടെ സിഎഎ പ്രസ്താവനയ്ക്ക് പിന്നാലെയാണ് കേന്ദ്രമന്ത്രിയുടെ പ്രസ്താവന. ബംഗാളിലെ സൗത്ത് 24 പര്‍ഗാനാസിലെ കാക്ദ്വീപില്‍ പൊതുസമ്മേളനത്തെ അഭിസംബോധന ചെയ്യുകയായിരുന്നു അദ്ദേഹം. ബംഗാളിലെ ബംഗാവില്‍ നിന്നുള്ള ബിജെപിയുടെ ലോക്സഭാ എംപിയാണ് ശന്തനു താക്കൂര്‍.
കഴിഞ്ഞ വര്‍ഷം ഡിസംബറില്‍ ബിജെപിയുടെ നേതൃത്വത്തിലുള്ള കേന്ദ്ര സര്‍ക്കാര്‍ കേന്ദ്രസര്‍ക്കാര്‍ പൗരത്വ ഭേദഗതി നിയമം നടപ്പാക്കുമെന്ന് അമിത് ഷാ പറഞ്ഞിരുന്നു. സിഎഎയെ ശക്തമായി എതിര്‍ക്കുന്ന തൃണമൂല്‍ കോണ്‍ഗ്രസ് അധ്യക്ഷയും പശ്ചിമ ബംഗാള്‍ മുഖ്യമന്ത്രിയുമായ മമത ബാനര്‍ജിയെ ലക്ഷ്യമിട്ടായിരുന്നു അദ്ദേഹത്തിന്റെ പരാമര്‍ശം. നുഴഞ്ഞുകയറ്റം, അഴിമതി, രാഷ്ട്രീയ അക്രമം, പ്രീണനം തുടങ്ങിയ വിഷയങ്ങളില്‍ മമതാ ബാനര്‍ജിക്കെതിരെ രൂക്ഷമായ ആക്രമണങ്ങള്‍ അഴിച്ചുവിട്ട അമിത് ഷാ, ബംഗാളില്‍ നിന്ന് തൃണമൂല്‍ സര്‍ക്കാരിനെ താഴെയിറക്കാനും 2026-നിയമസഭാ തിരഞ്ഞെടുപ്പില്‍ ബിജെപിയെ തിരഞ്ഞെടുക്കാനും ജനങ്ങളോട് അഭ്യര്‍ത്ഥിച്ചു. 2026ല്‍ ബിജെപി സംസ്ഥാനത്ത് മൂന്നില്‍ രണ്ട് ഭൂരിപക്ഷത്തോടെ അധികാരത്തിലെത്തുമെന്നും അദ്ദേഹം അവകാശപ്പെട്ടു. സിഎഎയ്ക്ക് അര്‍ഹരായ ഗുണഭോക്താക്കളെ കുറിച്ചും അദ്ദേഹം വ്യക്തത നല്‍കിയിരുന്നു. കൊല്‍ക്കത്തയിലെ ഐക്കണിക് എസ്പ്ലനേഡില്‍ നടന്ന ഒരു വലിയ റാലിയെ അഭിസംബോധന ചെയ്യുകയായിരുന്നു അദ്ദേഹം.
സിഎഎ പാര്‍ലമെന്റിന്റെ ഇരുസഭകളിലും പാസാക്കിയിരുന്നു. 2019 ല്‍ രാഷ്ട്രപതിയുടെ അനുമതി ലഭിക്കുകയും ചെയ്തു. സിഎഎ ഇന്ത്യയിലുടനീളമുള്ള വന്‍ പ്രതിഷേധങ്ങള്‍ക്കും അതിനെതിരായ പ്രതിപക്ഷത്തിന്റെ ശക്തമായ നിലപാടിനും കാരണമായിരുന്നു. സിഎഎയ്ക്കായി കേന്ദ്രം ഇതുവരെ ചട്ടങ്ങള്‍ രൂപീകരിക്കുകയും നിയമം നടപ്പാക്കുകയും ചെയ്യാത്തതിനാല്‍ ഇത് അനിശ്ചിതത്വത്തിലാണ്.
2019 ഡിസംബറിൽ പാർലമെന്റ് പാസാക്കിയ, സിഎഎ പാകിസ്ഥാൻ, ബംഗ്ലാദേശ്, അഫ്ഗാനിസ്ഥാൻ എന്നിവിടങ്ങളിലെ മുസ്ലീം ഇതര ന്യൂനപക്ഷങ്ങൾക്ക് ഗുണം ചെയ്യും. ഹിന്ദു, സിഖ്, ജൈന, ബുദ്ധ, പാഴ്സി, ക്രിസ്ത്യൻ വിഭാഗങ്ങൾക്ക് അവരുടെ രാജ്യങ്ങളിലെ പീഡനങ്ങളിൽ നിന്ന് രക്ഷപ്പെട്ട് ഇന്ത്യൻ പൗരത്വം ലഭിക്കാൻ ഈ നിയമം സഹായിക്കുന്നു. ഈ നിയമപ്രകാരം, 2014 ഡിസംബർ 31-ന് മുൻപ് ഇന്ത്യയിലെത്തിയ ഈ കമ്മ്യൂണിറ്റികളിൽ നിന്നുള്ള ആളുകളെ അനധികൃത കുടിയേറ്റക്കാരായി കണക്കാക്കില്ല, പകരം ഇന്ത്യൻ പൗരത്വം നൽകും.