ഇത്തവണത്തെ സംസ്ഥാന ബജറ്റിൽ വിവരസാങ്കേതിക വിദ്യയ്ക്കായി 559 കോടി രൂപ മാറ്റിവെച്ചതായി പ്രഖ്യാപിച്ച് ധനമന്ത്രി കെ എൻ ബാലഗോപാൽ. കേരള സ്റ്റേറ്റ് ഇൻഫർമേഷൻ ടെക്നോളജി മിഷന്റെ പ്രവർത്തനങ്ങൾക്കായി 127.37 കോടി രൂപ അനുവദിച്ചു. കേരള ഫൈബർ ഒപ്റ്റിക് നെറ്റ്വർക്ക് (കെ – ഫോൺ ) പദ്ധതിക്കായി 100 കോടി രൂപ വകയിരുത്തി. ഒരു നിയമസഭാ മണ്ഡലത്തിൽ 500 കുടുംബങ്ങൾ എന്ന നിരക്കിൽ അർഹരായ എഴുപതിനായിരം ബിപിഎൽ കുടുംബങ്ങൾക്കാണ് കെ ഫോൺ പദ്ധതിയുടെ കീഴിൽ സൗജന്യ ഗാർഹിക ഇന്റർനെറ്റ് കണക്ഷൻ നൽകുന്നത്. ഇതിനായി രണ്ടു കോടി രൂപ മാറ്റിയിട്ടുണ്ട്.
ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി ആൻഡ് മാനേജ്മെന്റ് കേരളയുടെ പ്രവർത്തനങ്ങൾ ഉൾപ്പെടെ ഡിജിറ്റൽ യൂണിവേഴ്സിറ്റിക്കായി 46.60 കോടി രൂപയാണ് നീക്കിയിട്ടുള്ളത്. തിരുവനന്തപുരം ടെക്നോപാർക്കിനായി 26.60 കോടി രൂപയും, കൊച്ചി ഇൻഫോ പാർക്കിനായി 35.75 കോടിയും, കോഴിക്കോട് സൈബർ പാർക്കിന് 12.83 കോടി രൂപയും മാറ്റിയിട്ടുണ്ട്. പൊതുമേഖലാ സ്ഥാപനമായ കേരള ഇൻഫർമേഷൻ ടെക്നോളജി ഇൻഫ്രാസ്ട്രക്ചറർ ലിമിറ്റഡിന് 201.09 കോടി രൂപയാണ് മാറ്റിയിട്ടുള്ളത്.