പെറുവിൽ സർക്കാർ വിരുദ്ധ പ്രതിഷേധങ്ങൾ അടിച്ചമർത്തുന്നതിന്റെ ഭാഗമായി തെക്കൻ പുനോ മേഖലയിൽ കർഫ്യൂ പ്രഖ്യാപിച്ചു. പ്രശ്ന ബാധിത മേഖലയായ പുനോയിൽ ആണ് സർക്കാർ കർഫ്യൂ ഏർപ്പെടുത്തിയത്. രാത്രി 8 മണി മുതൽ പുലർച്ചെ നാല് മണിവരെയാണ് കർഫ്യൂ. ഇത് മൂന്ന് ദിവസം തുടരുമെന്ന് പ്രധാനമന്ത്രി ആർബർട്ടോ ഒട്ടറോള അറിയിച്ചു.
തടവിലാക്കപ്പെട്ട മുൻ പ്രസിഡന്റ് പെഡ്രോ കാസ്റ്റിലോയെ മോചിപ്പിക്കണം, നേരത്തെയുള്ള തിരഞ്ഞെടുപ്പ്, എന്നിവ ആവശ്യപ്പെട്ടാണ് പെറുവിൽ പ്രതിഷേധങ്ങൾ ഉടലെടുക്കുന്നത്. തുടർന്ന് നടന്ന പ്രതിഷേധ റാലിയിൽ പോലീസ് വെടിവെപ്പിൽ കൗമാരക്കാർ അടക്കം 17 പേർ കൊല്ലപ്പെട്ടിരുന്നു. ഡിസംബർ ആദ്യവാരം മുതലാണ് പെറുവിൽ ജനകീയ പ്രതിഷേധം ആരംഭിച്ചത്. നിയമവിരുദ്ധമായി കോൺഗ്രസ് പിരിച്ചുവിടാൻ ശ്രമിച്ചതിന് തൊട്ടുപിന്നാലെ കാസ്റ്റിലോയെ നീക്കം ചെയ്യുകയും അറസ്റ്റുചെയ്യുകയും ചെയ്തതിനെത്തുടർന്നാണ് പ്രതിഷേധം.
കഴിഞ്ഞ ഡിസംബർ ആദ്യവാരമാണ് ഇടതുപക്ഷ ഫ്രീ പെറു പാർടി നേതാവ് പെഡ്രോ കാസ്റ്റിലോയെ പ്രസിഡന്റുസ്ഥാനത്തുനിന്ന് ഇംപീച്ച് ചെയ്തത്. അധികാരമേറ്റതുമുതൽ വലതുപക്ഷ സഖ്യത്തിന്റെ നേതൃത്വത്തിൽ നടക്കുന്ന അട്ടിമറിശ്രമങ്ങൾക്ക് ഒടുവിലായിരുന്നു ഇംപീച്ച്മെന്റ്. തുടർന്ന് വൈസ് പ്രസിഡന്റ് ദിന ബൊലുവാർട്ട് പ്രസിഡന്റായി അധികാരമേറ്റു.