ഏഷ്യയിലെ ഏറ്റവും സമ്പന്നനായ വ്യക്തിയായി വീണ്ടും മുകേഷ് അംബാനി. ഫോബ്സിന്റെ ശതകോടീശ്വര പട്ടികയിലാണ് റിലയൻസ് ഇൻഡസ്ട്രീസ് ചെയർമാൻ ഏഷ്യയിലെ ഒന്നാമത്തെ സമ്പന്നനായത്. 83.4 ബില്യൺ ഡോളർ ആണ് മുകേഷ് അംബാനിയുടെ ആസ്തി. ഫോബ്സിന്റെ പട്ടിക പ്രകാരം ലോക സമ്പന്ന പട്ടികയിൽ ഒൻപതാം സ്ഥാനത്താണ് മുകേഷ് അംബാനി. അംബാനിയുടെ ഓയിൽ-ടു-ടെലികോം ഭീമനായ റിലയൻസ് ഇൻഡസ്ട്രീസ് 100 ബില്യൺ ഡോളർ വരുമാനം മറികടക്കുന്ന ആദ്യത്തെ ഇന്ത്യൻ കമ്പനിയായിരുന്നു.
അംബാനിക്ക് പിന്നിൽ രണ്ടാമത്തെ ഏറ്റവും ധനികനായ ഇന്ത്യക്കാരനാണ് ഗൗതം അദാനി. 126 ബില്യൺ ഡോളർ ആസ്തിയുമായി ഏഷ്യയിലെ ഏറ്റവും വലിയ കോടീശ്വരനായിരുന്ന ഗൗതം അദാനി ഇപ്പോള്‍ 47.2 ബില്യൺ യുഎസ് ഡോളർ ആസ്തിയുമായി അംബാനിക്ക് പിന്നിലായി. ജനുവരി 24-ന് യു.എസ്. ഷോർട്ട് സെല്ലറായ ഹിൻഡൻബർഗ് റിസർച്ചിന്റെ റിപ്പോർട്ട് വന്നതോടെ അദ്ദേഹത്തിന്റെ ആസ്തിയിൽ ഇടിവ് നേരിട്ടിരുന്നു.
കഴിഞ്ഞ വര്ഷം റിലയൻസിൽ തലമുറമാറ്റവും നടന്നിരുന്നു. മുകേഷ് അംബാനി തന്റെ മക്കൾക്ക് പ്രധാന ചുമതലകൾ കൈമാറി.ഇതുപ്രകാരം, മൂത്ത മകൻ ആകാശ് ടെലികോം വിഭാഗമായ ജിയോ ഇൻഫോകോമിന്റെ ചെയർമാൻ, മകൾ ഇഷ റീട്ടെയിൽ ബിസിനസ് മേധാവി, ഇളയ മകൻ അനന്ത് റിലയൻസിന്റെ പുതിയ ഊർജ്ജ സംരംഭങ്ങളുടെ തലവനുമായി. ഫോർബ്‌സിന്റെ ലോക ശതകോടീശ്വരന്മാരുടെ പട്ടിക പ്രകാരം ലോകത്തിലെ ഏറ്റവും ധനികരായ 25 പേരുടെ മൂല്യം 2.1 ട്രില്യൺ ഡോളറാണ്, 2022 ലെ മൂല്യമായ 2.3 ട്രില്യൺ ഡോളറിൽ നിന്ന് 200 ബില്യൺ ഡോളറിന്റെ കുറവാണ് ഉണ്ടായത്.