സിംഗപ്പൂരിൽ കഞ്ചാവ് കടത്താന് സഹായം നൽകിയ കുറ്റത്തിന് പിടിയിലായ ഇന്ത്യന് വംശജൻ്റെ വധശിക്ഷ നടപ്പാക്കി. സിംഗപ്പൂരില് സ്ഥിരതാമസക്കാരനും തമിഴ്നാട് സ്വദേശിയുമായ തങ്കരാജു സുപ്പയ്യ (46) യുടെ വധശിക്ഷയാണ് നടപ്പാക്കിയത്. ഒരു കിലോയിലധികം കഞ്ചാവ് കടത്താന് കള്ളക്കടത്തുകാര്ക്ക് സഹായം നൽകിയെന്നാണ് തങ്കരാജുവിനെതിരെയുള്ള കുറ്റം. മയക്കുമരുന്ന് കടത്തിന് വധശിക്ഷ നൽകണമെന്നാണ് സിംഗപ്പൂർ നിയമം അനുശാസിക്കുന്നത്. എന്നാൽ വധശിക്ഷയ്ക്ക് എതിരെ പ്രതിഷേധങ്ങളും ഉയർന്നിട്ടുണ്ട്. താലിബാനിസത്തിൻ്റെ ആവര്ത്തനമാണ് സിംഗപ്പൂരില് അരങ്ങേറുന്നതെന്നും വിമര്ശനം ഉയർന്നിട്ടുണ്ട്.
2014 മാര്ച്ചിലാണ് തങ്കരാജു അറസ്റ്റിലായത്. കഞ്ചാവ് കച്ചവടത്തിൻ്റെ ഏകോപനം തങ്കരാജുവിനായിരുന്നു എന്നാണ് കണ്ടെത്തിയിരിക്കുന്നത്. തങ്കരാജുവിൻ്റെ മൊെബെല് ഫോണ് നമ്പര് മുഖേനെയാണ് കള്ളക്കടത്തുകാര് കഞ്ചാവ് കടത്താനുള്ള നീക്കം നടത്തിയതെന്നും കണ്ടെത്തിയിരുന്നു. മയക്കുമരുന്ന് രാജ്യത്തേക്ക് എത്തിക്കുന്നത് ഗുരുതരമായ കുറ്റകൃത്യമായാണ് കാണുന്നത്. തങ്കരാജ് നൽകിയ അവസാന അപ്പീലിൽ വാദം കേട്ട കോടതി, കഞ്ചാവ് കടത്ത് ഏകോപിപ്പിക്കാനുള്ള ഉത്തരവാദിത്തം തങ്കരാജുവിനാണെന്ന പ്രോസിക്യൂഷൻ വാദം അംഗീകരിച്ചിരുന്നു. തുടർന്നാണ് ശിക്ഷയിലേക്ക് നീങ്ങിയത്.
അതേസമയം ചോദ്യം ചെയ്യുമ്പോള് തങ്കരാജുവിന് തമിഴ് തര്ജമ സൗകര്യം ഒരുക്കിയില്ലെന്നും ആരോപണം നിലനിൽക്കുന്നുണ്ട്. ഇക്കാര്യം ചൂണ്ടിക്കാട്ടി തങ്കരാജുവിൻ്റെ കുടുംബവും വധശിക്ഷയെ എതിര്ക്കുന്നവരും പ്രതിഷേധം ഉയർത്തിയിട്ടുണ്ട്. തങ്കരാജുവിൻ്റെ ഇംഗ്ലീഷ് പരിജ്ഞാനം ദുര്ബലമാണെന്നും പോലീസ് ചോദ്യം ചെയ്തപ്പോള് എന്താണ് ചോദിച്ചതെന്നു മനസിലാക്കാനുള്ള അവബോധം അദ്ദേഹത്തിനുണ്ടായിരുന്നില്ല എന്നുമാണ് വാദം. ശിക്ഷ നടപ്പാക്കാതിരിക്കാനുള്ള അവസാന ശ്രമങ്ങളുടെ ഭാഗമായി തങ്കരാജുവിൻ്റെ കുടുംബം സിംഗപ്പുര് പ്രസിഡൻ്റിനു ദയാഹര്ജി സമര്പ്പിച്ചിരുന്നു.