ഉത്തർപ്രദേശിൽ ആറ് മാസത്തേക്ക് പണിമുടക്ക് നിരോധിച്ചു. ആറു മാസത്തേക്ക് ആണ് യോഗി സർക്കാർ പണിമുടക്ക് നിരോധിച്ചി രിക്കുന്നത് യുപിയിൽ സമരം നിരോധിക്കാൻ യോഗി സർക്കാർ അവശ്യ സേവന പരിപാലന നിയമം ഉപയോഗികുജ എന്നാണ് അറിയുന്നത്. പണിമുടക്ക് സമരം നിരോധിച്ചുകൊണ്ടുള്ള വിജ്ഞാപനം പുറത്തിറങ്ങിക്കഴിഞ്ഞു. സംസ്ഥാന സർക്കാരിൻ്റെ എല്ലാ വകുപ്പുകൾക്കും കോർപ്പറേഷനുകൾക്കും ഈ നിയമം ബാധകമായിരിക്കുമെന്നും അധികൃതർ അറിയിച്ചു.
നിയമം നടപ്പാക്കുന്ന സമയത്ത് ഏതെങ്കിലും സർക്കാർ ഉദ്യോഗസ്ഥൻ ചട്ടങ്ങൾ ലംഘിക്കുകയും കുറ്റക്കാരനാണെന്ന് കണ്ടെത്തുകയും ചെയ്താൽ അയാൾക്ക് ഒരു വർഷം തടവും 1,000 രൂപ പിഴയും വരെ ലഭിക്കും.ഇത് മാത്രമല്ല, ചട്ടങ്ങൾ ലംഘിച്ചതിന് വാറണ്ട് കൂടാതെ ആരെയും അറസ്റ്റ് ചെയ്യാനും പൊലീസിന് അധികാരമുണ്ടായിരിക്കും. സർക്കാർ ജീവനക്കാർക്കും ഉദ്യോഗസ്ഥർക്കും നിരവധി നിയന്ത്രണങ്ങൾ ഏർപ്പെടുത്തിക്കൊണ്ടാണ് ഏതൊരു സംസ്ഥാന സർക്കാരും എസ്മയുടെ വ്യവസ്ഥകൾ നടപ്പിലാക്കുന്നത്. ഈ കാലയളവിൽ, സംസ്ഥാന സർക്കാർ ജീവനക്കാർക്ക് ഓവർടൈം ജോലികൾ ഏർപ്പെടുത്തിയാൽ അത് നിരസിക്കാൻ കഴിയില്ല . പൊതു സംരക്ഷണം, ജലവിതരണം, ശുചിത്വം, ആശുപത്രികൾ, ദേശീയ പ്രതിരോധം എന്നിവയുമായി ബന്ധപ്പെട്ട എല്ലാ പ്രവർത്തനങ്ങളും അവശ്യ സേവനങ്ങളിൽ ഉൾപ്പെടുന്നു. ഇതോടൊപ്പം പെട്രോൾ, കൽക്കരി, വൈദ്യുതി, വളം, ഗതാഗത സേവനങ്ങൾ, ധാന്യങ്ങളുടെ വിതരണം എന്നിവയും അവശ്യ സേവനങ്ങളിൽ ഉൾപ്പെടുത്തിയിട്ടുണ്ട്.
1968ലാണ് പാർലമെൻ്റിൽ എസ്മ പാസാക്കിയത്. ഈ നിയമം ഉപയോഗിച്ച് ഏത് സംസ്ഥാന സർക്കാരിനും തങ്ങളുടെ അധികാര പരിധിയിലെ സമരം നിരോധിക്കാം. ഒരു മാസം മുതൽ ആറു മാസം വരെ ഈ നിയമം ബാധകമായിരിക്കും. കഴിഞ്ഞ വർഷവും എസ്മ നിയമം ചുമത്തി യുപി സർക്കാർ പണിമുടക്ക് നിരോധിച്ചിരുന്നു. അതിനു പിന്നാലെ വൈദ്യുതി വകുപ്പിലെ ചില ജീവനക്കാർ സമരത്തിനിറങ്ങിയിരുന്നു. രാജ്യത്ത് വൈദ്യുതി വിതരണം, ഗതാഗതം, മെഡിക്കൽ സേവനങ്ങൾ എന്നിവ ഉൾപ്പെടെയുള്ള അവശ്യ സേവനങ്ങളുടെ പരിപാലനം ഉറപ്പാക്കുക എന്നതായിരുന്നു ഈ നിയമം കൊണ്ടുവരുന്നതിലൂടെ സർക്കാർ ലക്ഷ്യമിടുന്നത്. അവശ്യ സേവനങ്ങൾ തടസ്സപ്പെടുത്തുന്നവർക്കെതിരെ അറസ്റ്റും പ്രോസിക്യൂഷനും ഉൾപ്പെടെയുള്ള കർശന നടപടികൾ സ്വീകരിക്കാൻ സംസ്ഥാന സർക്കാരുകൾക്ക് ഈ നിയമം അധികാരം നൽകുന്നുണ്ട്.