പ്രധാനമന്ത്രി നരേന്ദ്ര മോദിക്കെതിരായ അപകീർത്തികരമായ പരാമർശങ്ങളുടെ പശ്ചാത്തലത്തിൽ അവിശ്വാസ വോട്ടെടുപ്പ് ഉൾപ്പെടെ മാലിദ്വീപ് പ്രസിഡന്റ് മുഹമ്മദ് മുയിസുവിനെ പുറത്താക്കാനുള്ള നടപടികൾ സ്വീകരിക്കണമെന്ന് മാലദ്വീപിലെ പാർലമെന്ററി ന്യൂനപക്ഷ നേതാവ് അലി അസിം ആവശ്യപ്പെട്ടു. “ഞങ്ങൾ, ഡെമോക്രാറ്റുകൾ, രാജ്യത്തിന്റെ വിദേശനയത്തിന്റെ സ്ഥിരത ഉയർത്തിപ്പിടിക്കാനും അയൽരാജ്യത്തെ ഒറ്റപ്പെടുത്തുന്നത് തടയാനും പ്രതിജ്ഞാബദ്ധരാണ്. പ്രസിഡന്റ് മുഹമ്മദ് മുയിസുവിനെ അധികാരത്തിൽ നിന്ന് നീക്കം ചെയ്യാൻ ആവശ്യമായ എല്ലാ നടപടികളും സ്വീകരിക്കാൻ നിങ്ങൾ തയ്യാറാണോ? അവിശ്വാസ വോട്ട് ആരംഭിക്കാൻ തയ്യാറാണോ?” അലി അസിം എക്സിൽ കുറിച്ചു.
ജനുവരി രണ്ടിനാണ് നരേന്ദ്ര മോദി ലക്ഷദ്വീപിൽ സന്ദർശനം നടത്തിയത്. മോദിയുടെ ലക്ഷദ്വീപ് സന്ദർശനവുമായി ബന്ധപ്പെട്ട് മാലിദ്വീപ് മന്ത്രിമാർ നടത്തിയ അപകീർത്തികരമായ പരാമർശങ്ങൾ വിവാദമായിരിക്കുകയാണ്. ലക്ഷദ്വീപിൽ വരാനിരിക്കുന്ന വികസനങ്ങൾ സമ്പദ്വ്യവസ്ഥയ്ക്ക് വലിയ ഉത്തേജനം നൽകുകയും തദ്ദേശവാസികൾക്ക് അവസരങ്ങൾ സൃഷ്ടിക്കുകയും ചെയ്യുമെന്നും പ്രഫുൽ പട്ടേൽ പറഞ്ഞിരുന്നു. ടൂറിസം അടിസ്ഥാന സൗകര്യങ്ങൾ വർധിപ്പിക്കാൻ ഭരണകൂടം സജീവമായി പ്രവർത്തിക്കുന്നു. ലക്ഷദ്വീപിന്റെ പ്രകൃതി ഭംഗി വിനോദസഞ്ചാര മേഖലയുടെ വികസനത്തിന് വലിയ സാധ്യതകൾ വഹിക്കുന്നുണ്ടെന്ന് പട്ടേൽ വാർത്താ ഏജൻസിയായ പിടിഐയെ ഉദ്ധരിച്ച് പറഞ്ഞു. 225 താമസസൗകര്യങ്ങളുടെ നിർമ്മാണം നടന്നുവരികയാണ്. കൂടാതെ, സുഹേലിയിലെയും കദ്മത്തിലെയും വാട്ടർ വില്ലകൾ വികസനത്തിന്റെ വക്കിലാണെന്നും അദ്ദേഹം കൂട്ടിച്ചേർത്തു.
മോദി പങ്കുവെച്ച ചിത്രങ്ങൾക്ക് താഴെ മൂന്ന് മാലിദ്വീപ് മന്ത്രിമാർ അപകീർത്തികരമായ പരാമർശങ്ങൾ നടത്തി. ഈ കമന്റുകൾ സോഷ്യൽ മീഡിയയിൽ വലിയ ചർച്ചയായി. മോദിയെ കോമാളിയെന്നും ഇസ്രായേലിന്റെ പാവയെന്നും അടക്കം അധിക്ഷേപിച്ചായിരുന്നു കമന്റുകൾ. ഇതോടെ ഈ മന്ത്രിമാർക്കെതിരെ രൂക്ഷമായ പ്രതികരണം സോഷ്യൽ മീഡിയയിൽ നിന്നുണ്ടായി. ലക്ഷദ്വീപിനേയും മാലിദ്വീപിനേയും താരതമ്യം ചെയ്യുന്നതിനെ പരിഹസിച്ച് മാലിദ്വീപിലെ ഒരു ഭരണകക്ഷി നേതാവും പോസ്റ്റ് പങ്കുവെച്ചു. പ്രധാനമന്ത്രി മോദിയുടെ ലക്ഷദ്വീപ് സന്ദർശനത്തിന്റെ പ്രാധാന്യത്തെക്കുറിച്ചുള്ള ഇന്ത്യാ ടുഡേ വാർത്താ റിപ്പോർട്ട് പങ്കിട്ടുകൊണ്ടായിരുന്നു പരിഹാസം. ഇതോടെ ‘മാലിദ്വീപ് ബഹിഷ്കരിക്കുക’ എന്ന ഹാഷ്ടാഗ് ട്രെൻഡിങ് പട്ടികയിൽ മുന്നിലെത്തി.
അധിക്ഷേപ പരാമർശത്തിന് പിന്നാലെ മാലിദ്വീപ് മന്ത്രിമാരായ മൽഷ ഷെരീഫ്, മറിയം ഷിയൂന, അബ്ദുല്ല മഹ്സൂം മജീദ് എന്നിവരെ സസ്പെൻഡ് ചെയ്തു. മന്ത്രിമാരുടേത് വ്യക്തിപരമായ കാഴ്ചപ്പാടുകളാണെന്നും മാലിദ്വീപ് സർക്കാരിനെ പ്രതിനിധീകരിക്കുന്നില്ലെന്നുമായിരുന്നു സർക്കാർ പുറത്തിറക്കിയ ഔദ്യോഗിക പ്രസ്താവന. സാമൂഹിക മാധ്യമങ്ങളിലൂടെ നടത്തുന്ന വിദ്വേഷപരാമർശങ്ങൾക്കെതിരെ നടപടിയുണ്ടാകുമെന്നും സർക്കാർ വ്യക്തമാക്കി. ദ്വീപസമൂഹങ്ങളിൽ വിനോദസഞ്ചാരം പ്രോത്സാഹിപ്പിക്കുന്നതിനായുള്ള പ്രധാനമന്ത്രിയുടെ ലക്ഷദ്വീപ് സന്ദർശനത്തിന് പിന്നാലെയാണ് വിവാദം തുടങ്ങിയത്.