ആന്ധ്രാപ്രദേശിലെ തിരുപ്പതി ക്ഷേത്രത്തിലെ വൈകുണ്ഠ ദ്വാര ദർശന ടിക്കറ്റിംഗ് കേന്ദ്രത്തിന് സമീപം തിക്കിലും തിരക്കിലും പെട്ട് ആറ് മരണം. തീർത്ഥാടകർക്കുള്ള പ്രത്യേക സന്ദർശനമായ വൈകുണ്ഠ ദ്വാര ദർശനത്തിന് ടോക്കൺ ലഭിക്കാൻ നാലായിരത്തിലധികം ആളുകൾ ക്യൂവിൽ നിൽക്കുന്നതിനിടയിലാണ് സംഭവം. എന്നാൽ ആളുകൾ ഇടിച്ച് കയറിയതിനെ തുടർന്നാണ് ദുരന്തം ഉണ്ടായതെന്ന് തിരുപ്പതി ദേവസ്വം വിശദീകരിച്ചു.
വൈകുണ്ഠ ഏകാദശി ടോക്കൺ വിതരണത്തിന് ഒരു ദിവസം മുമ്പ് അണിനിരക്കാൻ തുടങ്ങിയ ഭക്തരുടെ വൻ തിരക്കാണ് ഇതുവരെ ആറ് പേരുടെ ജീവൻ അപഹരിച്ച സംഭവത്തിന് കാരണമായത്. വ്യാഴാഴ്ച പുലർച്ചെയാണ് വൈകുണ്ഠ ഏകാദശിക്ക് വേണ്ടിയുള്ള കൗണ്ടറുകളിൽ കൂപ്പൺ വിതരണം തുടങ്ങേണ്ടിയിരുന്നത്. എന്നാൽ ഇന്നലെ രാവിലെ മുതൽ തന്നെ ഇവിടെ ആളുകൾ ക്യൂവിൽ നിൽക്കാനായി എത്തിയിരുന്നു. എന്നാൽ ക്യൂവിലേക്ക് ആരേയും അധികൃതർ കടത്തി വിട്ടിരുന്നില്ല. ഇതിനിടെ ക്യൂവിന് മുന്നിലെ ആൾക്കൂട്ടത്തിനിടയിൽ നിൽക്കുകയായിരുന്ന ഒരു സ്ത്രീയ്ക്ക് ശ്വാസം മുട്ട് അനുഭവപ്പെട്ടു. ഇവരെ പുറത്തേക്ക് കൊണ്ട് പോകാൻ ക്യൂവിന്‍റെ ഒരു ഭാഗം പൊലീസ് കുറച്ച് തുറന്നു. ഈ സമയത്ത് ഇവിടേക്ക് ആളുകൾ ഇടിച്ച് കയറുകയായിരുന്നു. ക്യൂ വ്യാഴാഴ്ച മാത്രമേ തുറക്കൂ എന്നതിനാൽ വലിയൊരു ക്യൂ നിയന്ത്രിക്കാൻ ഉള്ള സംവിധാനമോ ആൾബലമോ അപ്പോൾ പൊലീസിന് ഉണ്ടായില്ലെന്നും അധികൃതർ അറിയിച്ചു. ഇതാണ് വലിയ ദുരന്തത്തിന് വഴി വച്ചതെന്ന് ജില്ലാ പൊലീസ് മേധാവിയും തിരുമല തിരുപ്പതി ദേവസ്വം ചെയർമാനും അറിയിച്ചു.
വലിയ ജനക്കൂട്ടത്തെ പങ്കെടുപ്പിച്ച് വ്യാഴാഴ്ച രാവിലെ മുതൽ ടോക്കണുകൾ വിതരണം ചെയ്യാനായിരുന്നു പദ്ധതി. എന്നാൽ ബൈരാഗി പട്ടേടയിലും എംജിഎം സ്കൂൾ സെൻ്ററിലും നീണ്ട ക്യൂവിൽ ഭക്തർ തടിച്ചുകൂടിയതാണ് തിക്കിലും തിരക്കിലും കലാശിച്ചത്. ഭക്തർക്ക് ടോക്കൺ ലഭിക്കുന്നതിനായി 91 കൗണ്ടറുകൾ തുറന്നിട്ടുണ്ടെന്ന് തിരുമല തിരുപ്പതി ദേവസ്ഥാനം (ടിടിഡി) ബോർഡ് അംഗം ഭാനു പ്രകാശ് റെഡ്ഡി പറഞ്ഞു. ജനുവരി 10 ന് ആരംഭിക്കുന്ന 10 ദിവസത്തെ വൈകുണ്ഠ ദ്വാര ദർശനത്തിന് രാജ്യത്തിൻ്റെ വിവിധ ഭാഗങ്ങളിൽ നിന്ന് നൂറുകണക്കിന് ഭക്തരാണ് എത്തിയത്.
ദർശന ടോക്കണുകളോ ടിക്കറ്റുകളോ കൈവശം വച്ചിരിക്കുന്ന ഭക്തരെ മാത്രമേ ടോക്കണിൽ സൂചിപ്പിച്ചിരിക്കുന്ന നിശ്ചിത സമയങ്ങളിൽ ക്യൂവിൽ പ്രവേശിപ്പിക്കൂ എന്ന് ടിടിഡി അറിയിച്ചു. തിരുമലയിലെ പരിമിതമായ താമസസൗകര്യം കണക്കിലെടുത്ത് എക്‌സിക്യൂട്ടീവ് ഓഫീസർ (ഇഒ) ജെ ശ്യാമള റാവുവാണ് പ്രഖ്യാപനം നടത്തിയത്. ഭക്തർ വൻതോതിൽ എത്തുമെന്ന് പ്രതീക്ഷിച്ച്, തിരുപ്പതിയിലും തിരുമലയിലുമായി മൂവായിരത്തോളം പോലീസുകാരെയും തിരുപ്പതിയിൽ 1,200 ഉം തിരുമലയിൽ 1,800 പോലീസുകാരെയും വിന്യസിച്ചതായി ക്ഷേത്രം അധികൃതർ പ്രഖ്യാപിച്ചിരുന്നു.