കൊല്ലത്ത് പോലീസിനെതിരെ ആത്മഹത്യകുറിപ്പ് എഴുതി സാമൂഹ്യമാധ്യമങ്ങളിൽ പോസ്റ്റ് ചെയ്തശേഷം വിദ്യാർത്ഥി ആത്മഹത്യയ്ക്ക് ശ്രമിച്ചു. ഓച്ചിറ ക്ലാപ്പന സ്വദേശിയായ 16 കാരനാണ് വിഷക്കായ കഴിച്ച് ആത്മഹത്യ ചെയ്യാൻ ശ്രമിച്ചത്. അടിപിടി കേസിൽ ഓച്ചിറ പോലീസ് ഭീഷണിപ്പെടുത്തി എന്നും ഒത്തുതീർപ്പിന് ശ്രമിച്ചു എന്നും ആരോപിച്ചാണ് വിദ്യാർത്ഥി ജീവനൊടുക്കാൻ ഒരുങ്ങിയത്. വിദ്യാർത്ഥി ഇപ്പോൾ ആലപ്പുഴ മെഡിക്കൽ കോളേജ് ആശുപത്രിയിലാണ് ഉള്ളത്.
ഓച്ചിറ പോലീസിനെതിരെയാണ് വിദ്യാർത്ഥി ആരോപണം ഉന്നയിച്ചത്. കഴിഞ്ഞ ഇരുപത്തിമൂന്നാം തീയതിയാണ് കേസിന് ആസ്പദമായ സംഭവം നടന്നത്. അന്നേദിവസം ചികിത്സയിലുള്ള വിദ്യാർത്ഥി ഉൾപ്പെടെ നാലു പേരെ ഒരു സംഘം വിദ്യാർഥികൾ ആക്രമിച്ചു എന്ന് ചൂണ്ടിക്കാട്ടി പോലീസിൽ പരാതി നൽകിയിരുന്നു. എന്നാൽ കേസിൽ പോലീസ് നടപടി എടുത്തില്ല എന്നും പകരം കേസ് ഒത്തുതീർപ്പാക്കാൻ ആണ് ശ്രമിച്ചതെന്നും വിദ്യാർത്ഥി ആരോപിച്ചു.
അതേസമയം ആരോപണം പോലീസ് നിഷേധിച്ചു. ഭീഷണിപ്പെടുത്തിയിട്ടില്ലെന്നും വിദ്യാർത്ഥികൾ തമ്മിൽ ചേരി തിരിഞ്ഞ് അടി കൂടുകയായിരുന്നു എന്നും പോലീസ് പറഞ്ഞു. ഇരു കൂട്ടരും പരാതി തന്നതിനെ തുടർന്നാണ് ഒത്തുതീർപ്പിന് ശ്രമിച്ചതെന്നും പോലീസ് അറിയിച്ചു.