വംശീയ സംഘര്‍ഷം രൂക്ഷമായ മണിപ്പൂരില്‍ പ്രതിപക്ഷ സഖ്യമായ ഇന്ത്യയുടെ പ്രതിനിധികൾ ഇന്നും നാളെയും സന്ദർശനം നടത്തും. എംപിമാർ രാവിലെ 8.55ന് ഇന്‍ഡിഗോ വിമാനത്തിൽ പുറപ്പെട്ടു. 30ന് മണിപ്പൂർ ഗവര്‍ണറെയും സംഘം കാണും. 16 പാര്‍ട്ടികളുടെ പ്രതിനിധി സംഘത്തില്‍ 20 അംഗങ്ങളുണ്ട്.
മലയോര മേഖലയിലേക്ക് സംഘം ആദ്യം പോകുമെന്നാണ് വിവരം.ഇതിന് ശേഷം അദ്ദേഹം സംഘര്‍ഷബാധിത താഴ്വരകള്‍ സന്ദര്‍ശിക്കും. ഇതോടൊപ്പം ഇരുവിഭാഗങ്ങളിലേയും ജനങ്ങള്‍ താമസിക്കുന്ന ദുരിതാശ്വാസ ക്യാമ്പുകളിലും സംഘമെത്തും. സംസ്ഥാന ഗവര്‍ണറെയും ഇവര്‍ കാണും.
മുഖ്യമന്ത്രിമാരുടെ സംഘം സംസ്ഥാനം സന്ദര്‍ശിക്കണമെന്ന് പ്രതിപക്ഷ സംഘം തീരുമാനിച്ചിരുന്നുവെങ്കിലും ഈ പദ്ധതി പിന്നീട് ഉപേക്ഷിക്കുകയായിരുന്നു. ഇടതുപക്ഷത്തിന്റെയും ടിഎംസിയുടെയും പ്രതിനിധി സംഘം നേരത്തെ മണിപ്പൂര്‍ സന്ദര്‍ശിച്ചിട്ടുണ്ട്. കോണ്‍ഗ്രസ് നേതാവ് രാഹുല്‍ ഗാന്ധിയും സംസ്ഥാനത്തെ ചില സ്ഥലങ്ങളില്‍ സന്ദര്‍ശനം നടത്തി. മെയ് 3 മുതല്‍ കുക്കി, മെയ്‌തേയ് വിഭാഗങ്ങള്‍ തമ്മില്‍ തുടരുന്ന സംഘര്‍ഷത്തില്‍ ഇതുവരെ 150 പേര്‍ മരിച്ചു. നിരവധി പേരുടെ വീടുകളും കടകളും കത്തിനശിച്ചിട്ടുണ്ട്.