മുൻ രാഷ്ട്രപതി രാംനാഥ് കോവിന്ദിന്റെ നേതൃത്വത്തിലുള്ള പാനൽ ‘ഒരു രാജ്യം ഒരു തിരഞ്ഞെടുപ്പ്’ എന്നതിനെ സംബന്ധിച്ചുള്ള വിപുലമായ റിപ്പോർട്ട് രാഷ്ട്രപതിയ്ക്ക് സമർപ്പിച്ചു. ഒരേസമയം തിരഞ്ഞെടുപ്പ് എന്ന രീതി പുനഃസ്ഥാപിക്കുന്നതിന് നിയമപരമായി സാധുതയുള്ള സംവിധാനം കേന്ദ്രസർക്കാർ വികസിപ്പിക്കണമെന്നാണ് ഉന്നതതല സമിതിയുടെ ശുപാർശ. റിപ്പോർട്ട് രാഷ്ട്രപതി ദ്രൗപതി മുർമുവിന് സമർപ്പിച്ചത്. 18,626 പേജുകൾ ഉൾക്കൊള്ളുന്ന റിപ്പോർട്ട് പൂർത്തിയാകുന്നത് 191 ദിവസംകൊണ്ടാണ്. കഴിഞ്ഞ ദിവസം ഡൽഹിയിലെ രാഷ്ട്രപതി ഭവനിൽ പാനൽ കൂടിക്കാഴ്ച നടത്തിയ ശേഷമാണ് രാഷ്ട്രപതിയ്ക്ക് റിപ്പോർട്ട് സമർപ്പിച്ചത്. 2023 സെപ്റ്റംബർ 2-ന് പഠനം ആരംഭിച്ചതുമുതൽ വിദഗ്ധരുമായും ഗവേഷണ പ്രവർത്തനങ്ങളുമായും വിപുലമായ ചർച്ചകളാണ് നടത്തിയിട്ടുള്ളത്.
പഞ്ചായത്തുകളിലും മുനിസിപ്പാലിറ്റികളിലും പൊതുതിരഞ്ഞെടുപ്പും സംസ്ഥാന നിയമസഭകളുടേയും പൊതുതിരഞ്ഞെടുപ്പുകൾ സാധ്യമാക്കുന്നതിന് ആർട്ടിക്കിൾ 324(എ) അവതരിപ്പിക്കാനും കമ്മിറ്റി ശുപാർശ ചെയ്തു. ലോക്സഭാ, സംസ്ഥാന നിയമസഭാ തെരഞ്ഞെടുപ്പുകൾ ഒരേസമയം നടത്തണമെന്നും അത് പൂർത്തീകരിച്ച് 100 ദിവസത്തിനകം മുനിസിപ്പാലിറ്റി, പഞ്ചായത്ത് തെരഞ്ഞെടുപ്പുകൾ നടത്തണമെന്നും നിർദേശിച്ചു.
രാംനാഥ് കോവിന്ദിന്റെ നേതൃത്വത്തിലുള്ള സമിതിയിൽ കേന്ദ്ര ആഭ്യന്തര മന്ത്രി അമിത് ഷാ, രാജ്യസഭയിലെ മുൻ പ്രതിപക്ഷ നേതാവ് ഗുലാം നബി ആസാദ്, മുൻ ധനകാര്യ കമ്മീഷൻ ചെയർമാൻ എൻ.കെ. സിംഗ്, മുൻ ലോക്സഭാ സെക്രട്ടറി ജനറൽ സുഭാഷ് കശ്യപ്, മുതിർന്ന അഭിഭാഷകൻ ഹരീഷ് സാൽവെ എന്നിവരും അംഗങ്ങളാണ്.