പ്രാർത്ഥനകൾ വിഫലമാക്കി നേപ്പാളിലെ പൊഖറയിൽ യാത്രാവിമാനം തകർന്ന് വീണുണ്ടായ അപകടത്തിൽ എല്ലാവരും മരിച്ചതായി വിവരം. 68 പേരുടെ മൃതദേഹങ്ങൾ പുറത്തെടുത്തു. യതി എയർലൈൻസിന്റെ എ ടി ആർ 72 വിമാനമാണ് തകർന്നു വീണത്. പ്രാദേശികസമയം രാവിലെ 11 30നാണ് വിമാനം അപകടത്തിൽപ്പെട്ടത്. പൊറാഖാ അന്താരാഷ്ട്ര വിമാനത്താവളത്തിന് സമീപത്തായി വിമാനം ലാൻഡ് ചെയ്യുന്നതിന് തൊട്ടു മുൻപാണ് തകർന്നത്. അപകട സമയത്ത് 68 യാത്രക്കാരും 4 ജീവനക്കാരുമാണ് വിമാനത്തിൽ ഉണ്ടായിരുന്നത്. രണ്ട് കൈക്കുഞ്ഞുങ്ങളടക്കം മൂന്ന് കുട്ടികളും വിമാനത്തിൽ ഉണ്ടായിരുന്നു. മരണസംഖ്യ ഇനിയും ഉയർന്നേക്കും എന്നാണ് സൂചന. മരണപ്പെട്ടവരിൽ അഞ്ച് ഇന്ത്യക്കാരും ഉൾപ്പെടുന്നു. മൃതദേഹങ്ങൾ തിരിച്ചറിഞ്ഞിട്ടില്ല. കത്തിക്കരിഞ്ഞ നിലയിലാണ് മൃതദേഹങ്ങൾ. കഠ്മണ്ഡുവിൽ നിന്നും 72 പേരുമായി പൊഖറയിലേക്ക് എത്തിയ വിമാനം ലാൻഡ് ചെയ്യുന്നതിന് മുൻപ് സെത്തീ നദീ തീരത്ത് തകർന്ന് വീഴുകയായിരുന്നു.
കാഠ്മണ്ഡുവിൽ നിന്നും പൊറാഖയിലേക്ക് പോയ യതി എയർലൈൻസിന്റെ 9എൻ എൻ എൻ സി എ ടി ആർ 72 വിമാനമാണ് ലാൻഡിങ്ങിന് തൊട്ടുമുമ്പ് തകർന്നത്. റൺവേയ്ക്ക് സമീപം തകർന്നുവീണതിന് പിന്നാലെ വിമാനത്തിൽ തീ പിടിച്ചു. ഏറെ നേരത്തെ പരിശ്രമത്തിനു ശേഷമാണ് തീ അണക്കാൻ കഴിഞ്ഞത്. 10 30 ഓടെ കാഠ്മണ്ഡുവിൽ നിന്നും പറന്നുയർന്ന വിമാനം 20 മിനിട്ടുകൾക്കകം തകർന്നു വീഴുകയായിരുന്നു. 53 നേപ്പാൾ സ്വദേശികൾ , 5 ഇന്ത്യക്കാർ, രണ്ട് കൊറിയക്കാർ , നാല് റഷ്യക്കാർ , ഫ്രാൻസ്, അർജന്റീന, അയർലൻഡ് എന്നിവിടങ്ങളിൽ നിന്നുള്ള ഓരോരുത്തരും ആണ് യാത്രക്കാരിൽ ഉണ്ടായിരുന്നതെന്നാണ് ലഭിക്കുന്ന വിവരം. ലാൻഡ് ചെയ്യാനായി ഇറങ്ങിയ വിമാനം റൺവേയിൽ എത്തുന്നതിനു മുൻപ് വൻ ശബ്ദത്തോടെ തകർന്നുവീണു തീ പിടിക്കുകയായിരുന്നു എന്ന് ദൃക്സാക്ഷികൾ പറയുന്നു. അപകടത്തെ തുടർന്ന് പ്രധാനമന്ത്രി അടിയന്തരയോഗം വിളിച്ചുകൂട്ടി. സംഭവത്തിൽ വിശദമായ അന്വേഷണം നടത്തുമെന്ന് അധികൃതർ അറിയിച്ചു. അപകടത്തിന്റെ കാരണം വ്യക്തമായിട്ടില്ല. നാല് ജീവനക്കാരടക്കം 72 പേരാണ് വിമാനത്തിൽ ഉണ്ടായിരുന്നത്. 15 ദിവസം മുൻപാണ് ഈ വിമാനത്താവളം പ്രവർത്തനം തുടങ്ങിയത്. സംഭവത്തിൽ വിശദമായ അന്വേഷണം നടത്തുമെന്ന് നേപ്പാൾ സർക്കാർ അറിയിച്ചിട്ടുണ്ട്. യാത്രക്കാരുടെ പേര് വിവരങ്ങൾ പുറത്ത് വന്നിട്ടുണ്ട്.
വിമാനാപകടത്തിന്റെ പശ്ചാത്തലത്തിൽ നേപ്പാളിൽ ഒരു ദിവസത്തെ ദേശീയ ദുഃഖാചരണം പ്രഖ്യാപിച്ചു. നാളെ പൊതു അവധിയാണ്. അന്വേഷണത്തിനായി അഞ്ചംഗ കമ്മിറ്റിയും രൂപീകരിച്ചിട്ടുണ്ട്. 53 നേപ്പാളികൾ, നാല് റഷ്യക്കാർ, ഒരു ഐറിഷ് പൗരൻ, രണ്ട് കൊറിയക്കാർ, ഒരു അർജന്റീനക്കാരൻ, ഒരു ഫ്രഞ്ച് പൗരൻ എന്നിവരാണ് അപകടസമയത്ത് വിമാനത്തിലുണ്ടായിരുന്നതെന്ന് എയർപോർട്ട് അതോറിറ്റി അധികൃതർ പറഞ്ഞു. ബ്ലാക്ക്ബോക്സിൽ നിന്നുള്ള വിവരങ്ങൾ വിശകലനം ചെയ്ത ശേഷമേ തകർച്ചയുടെ കാരണം വ്യക്തമാകൂ. ചൈനീസ് സഹായത്തോടെ നിർമ്മിച്ച നേപ്പാളിലെ മൂന്നാമത്തെ അന്താരാഷ്ട്ര വിമാനത്താവളമായ പുതിയ വിമാനത്താവളം 2023 ജനുവരി ഒന്നിനാണ് ഉദ്ഘാടനം ചെയ്യുന്നത്.