യുവ സംവിധായക നയന സൂര്യയുടെ മരണവുമായി ബന്ധപ്പെട്ട അന്വേഷണം ക്രൈംബ്രാഞ്ചിന്. നയനയുടെ മരണം കൊലപാതകമാണെന്ന സംശയത്തിന്റെ അടിസ്ഥാനത്തിലാണ് അന്വേഷണം ക്രൈംബ്രാഞ്ചിന് വിട്ടത്. തിരുവനന്തപുരം സിറ്റി പോലീസ് കമ്മീഷണർ ഉന്നതഉദ്യോഗസ്ഥരുമായി നടത്തിയ ചർച്ചയ്ക്ക് ഒടുവിലാണ് തീരുമാനം. എഡിജിപി എം ആർ അജിത് കുമാർ ഇത് സംബന്ധിച്ചു ഉത്തരവിറക്കി.
കേസിൽ വിശദമായ അന്വേഷണം വേണമെന്ന് നിലവിലെ അന്വേഷണ ഉദ്യോഗസ്ഥനായ ജെ ദിനിൽ അഭിപ്രായപ്പെട്ടിരുന്നു. തുടർന്ന് നയനയുടെ മരണത്തിലെ കൊലപാതകസാധ്യത അന്വേഷിക്കാൻ തിരുവനന്തപുരം സിറ്റി പോലീസ് കമ്മീഷണർ ഉന്നതഉദ്യോഗസ്ഥരുമായി ചർച്ചകൾ നടത്തിവരികയായിരുന്നു. തുടർന്നാണ് അന്വേഷണം ക്രൈംബ്രാഞ്ചിന് വിടാൻ തീരുമാനമായത്. കഴിഞ്ഞദിവസം പോലീസ് നയന വാടകയ്ക്ക് താമസിച്ചിരുന്ന വെള്ളയമ്പലത്തെ വീട്ടിൽ പ്രധാന സാക്ഷി മെറിന് ഒപ്പമെത്തി തെളിവെടുപ്പ് നടത്തിയിരുന്നു.