മദ്ധ്യപ്രദേശ് മുഖ്യമന്ത്രിയായി മോഹന് യാദവ് സത്യപ്രതിജ്ഞ ചെയ്തു. ഉപമുഖ്യമന്ത്രിമാരായ ജഗദീഷ് ദേവ്ദ, രാജേന്ദ്ര ശുക്ല എന്നിവരും അധികാരമേറ്റു. പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, ബിജെപി ഭരിക്കുന്ന വിവിധ സംസ്ഥാനങ്ങളിലെ മുഖ്യമന്ത്രിമാര് തുടങ്ങിയവര് ചടങ്ങില് പങ്കെടുത്തു.
ദിവസങ്ങള് നീണ്ട സസ്പെന്സ് അവസാനിപ്പിച്ച്, തിങ്കളാഴ്ചയാണ് 58 കാരനായ മോഹന് യാദവിനെ മദ്ധ്യപ്രദേശിന്റെ പുതിയ മുഖ്യമന്ത്രിയായി തിരഞ്ഞെടുത്തത്. അഞ്ചാം തവണയും മുഖ്യമന്ത്രി സ്ഥാനം ലക്ഷ്യമിട്ട ശിവരാജ് സിഹ് ചൗഹനെ പിന്തള്ളിയാണ് യാദവ് തിരഞ്ഞെടുക്കപ്പെട്ടത്. നേരത്തെ ചൗഹാന് സര്ക്കാരിലെ മന്ത്രിയായിരുന്നു മോഹന് യാദവ്.
ഭോപ്പാലിൽ ക്ഷേത്രദർശനത്തിന് ശേഷമാണ് യാദവ് സത്യപ്രതിജ്ഞ ചടങ്ങിന് പോയത്. ജനസംഘത്തിന്റെ സ്ഥാപക അംഗങ്ങളിലൊരാളായ പണ്ഡിറ്റ് ദീന്ദയാല് ഉപാധ്യായയ്ക്കും ബിജെപിയുടെ സ്ഥാപക സൈദ്ധാന്തികന് ശ്യാമ പ്രസാദ് മുഖര്ജിക്കും ആദരാഞ്ജലികള് അര്പ്പിക്കാന് അദ്ദേഹം സംസ്ഥാന ബിജെപിയുടെ ഓഫീസിലുമെത്തിയിരുന്നു. രാഷ്ട്രീയ സ്വയംസേവക് സംഘുമായി ഏറെ അടുപ്പം പുലര്ത്തുന്ന അദ്ദേഹം ഉജ്ജയിന് സൗത്തില് നിന്നാണ് ജനവിധി തേടിയത്. കഴിഞ്ഞ നിയമസഭാ തിരഞ്ഞെടുപ്പിൽ, കോൺഗ്രസ് സ്ഥാനാർത്ഥി ചേതൻ പ്രേംനാരായണിനെ 12,941 വോട്ടിന്റെ ഭൂരിപക്ഷത്തിലാണ് അദ്ദേഹം തോൽപ്പിക്കുന്നത്. 95,699 വോട്ടുകൾ നേടിയാണ് അദ്ദേഹം തുടർച്ചയായ മൂന്നാം തവണയും എംഎൽഎഎ ആയത്. മദ്ധ്യപ്രദേശിലെ 230 നിയമസഭാ സീറ്റുകളിലേക്ക് നവംബർ 17-ന് ഒറ്റഘട്ടമായാണ് വോട്ടെടുപ്പ് നടന്നത്. ഡിസംബർ 3ന് വോട്ടെണ്ണൽ നടത്തി ഫലം പ്രഖ്യാപിച്ചു. സംസ്ഥാനത്ത് 20 വർഷത്തോളം ഭരണത്തിൽ തുടർന്ന ബിജെപി 163 സീറ്റുകൾ നേടി മികച്ച നേട്ടമുണ്ടാക്കിയപ്പോൾ കോൺഗ്രസ് 66 സീറ്റുകളിൽ ഒതുങ്ങി
2013ലാണ് യാദവ് ആദ്യമായി ഉജ്ജയിന് സൗത്തില് നിന്ന് എംഎല്എയായി തിരഞ്ഞെടുക്കപ്പെട്ടത്. പിന്നീട് 2018ലും 2023ലും അദ്ദേഹം നിയമസഭാ സീറ്റ് നിലനിര്ത്തുകയായിരുന്നു. അദ്ദേഹം മദ്ധ്യപ്രദേശിലെ ഉന്നത വിദ്യാഭ്യാസ മന്ത്രിയായും സേവനമനുഷ്ഠിച്ചിട്ടുണ്ട്. സംസ്ഥാന ജനസംഖ്യയുടെ 48 ശതമാനത്തിലധികം വരുന്ന ഒബിസി സമുദായത്തില് നിന്നുള്ളയാളാണ് യാദവ്. 1965 മാർച്ച് 25ന് മദ്ധ്യപ്രദേശിലെ ഉജ്ജയിനിയിലാണ് അദ്ദേഹം ജനിക്കുന്നത്. രാഷ്ട്രീയ ജീവിതം കൂടാതെ, ഒരു വ്യവസായി കൂടിയാണ് യാദവ്.