മുംബൈ മുനിസിപ്പൽ കോർപ്പറേഷൻ (ബിഎംസി) ഉൾപ്പെടെ മഹാരാഷ്ട്രയിലെ വിവിധ തദ്ദേശ സ്വയംഭരണ സ്ഥാപനങ്ങളിലേക്ക് നടന്ന തിരഞ്ഞെടുപ്പിൽ ബിജെപി നയിക്കുന്ന മഹായുതി സഖ്യം നേടിയ വൻ വിജയത്തെ പ്രധാനമന്ത്രി നരേന്ദ്ര മോദി അഭിനന്ദിച്ചു. സദ്ഭരണത്തിനും പൊതുക്ഷേമത്തിനുമുള്ള എൻഡിഎയുടെ അജണ്ടയെ മഹാരാഷ്ട്രയിലെ ജനങ്ങൾ അനുഗ്രഹിച്ചുവെന്ന് പ്രധാനമന്ത്രി പറഞ്ഞു. തിരഞ്ഞെടുപ്പ് ഫലങ്ങൾ പുറത്തുവന്നതിന് പിന്നാലെ എക്സിലൂടെയായിരുന്നു അദ്ദേഹത്തിന്റെ പ്രതികരണം.
“നന്ദി മഹാരാഷ്ട്ര! പൊതുക്ഷേമത്തിനും സദ്ഭരണത്തിനുമുള്ള എൻഡിഎയുടെ അജണ്ടയെ സംസ്ഥാനത്തെ ആവേശഭരിതരായ ജനങ്ങൾ അനുഗ്രഹിച്ചിരിക്കുന്നു. എൻഡിഎയും മഹാരാഷ്ട്രയിലെ ജനങ്ങളും തമ്മിലുള്ള ബന്ധം കൂടുതൽ ശക്തമായെന്ന് നഗരസഭാ തിരഞ്ഞെടുപ്പ് ഫലങ്ങൾ കാണിക്കുന്നു. വികസനത്തെക്കുറിച്ചുള്ള ഞങ്ങളുടെ കാഴ്ചപ്പാട് ജനഹൃദയങ്ങളെ സ്പർശിച്ചു. ഈ ജനവിധി സംസ്ഥാനത്തിന്റെ പുരോഗതിക്ക് കൂടുതൽ കരുത്ത് പകരും,” പ്രധാനമന്ത്രി കുറിച്ചു.