തീപിടുത്തത്തെ തുടർന്ന് 18 മണിക്കൂർ അടച്ചിട്ട ലണ്ടനിലെ ഹീത്രോ വിമാനത്താവളത്തിലെ വിമാന സർവീസുകൾ വെള്ളിയാഴ്ച വൈകി പുനരാരംഭിച്ചു. യൂറോപ്പിലെ ഏറ്റവും തിരക്കേറിയ വിമാനത്താവളത്തിലെ വൈദ്യുതി വിതരണം തീപിടുത്തത്തെ തുടർന്ന് നിലച്ചതോടെ വിമാനത്താവളം അടച്ചിടുകയായിരുന്നു. പതിനായിരക്കണക്കിന് യാത്രക്കാർ കുടുങ്ങി, ഇതോടെ ലോകമെമ്പാടും യാത്രാ പ്രതിസന്ധി സൃഷ്ടിച്ചു.
വ്യാഴാഴ്ച രാത്രിയിൽ അടുത്തുള്ള ഒരു സബ്‌സ്റ്റേഷനിൽ ഉണ്ടായ വൻ തീപിടുത്തത്തെത്തുടർന്ന് പൂർണ്ണമായും അടച്ചുപൂട്ടേണ്ടി വന്നിരുന്നു. വിമാനത്താവളം വീണ്ടും തുറക്കാൻ തങ്ങളുടെ ടീം അക്ഷീണം പ്രയത്നിച്ചതായും യാത്രക്കാരോട് അകന്നു നിൽക്കാൻ പറഞ്ഞതായും വിമാനത്താവള അധികൃതർ പറഞ്ഞു. പ്രവർത്തനം പുനരാരംഭിച്ച ശേഷം, വെള്ളിയാഴ്ച സൂര്യാസ്തമയത്തിന് തൊട്ടുമുമ്പ് ആദ്യ വിമാനം ലാൻഡ് ചെയ്തു. ശനിയാഴ്ച വിമാനത്താവളം പൂർണ്ണ തോതിൽ പ്രവർത്തനക്ഷമമാകുമെന്ന് പ്രതീക്ഷിക്കുന്നു.
വ്യാഴാഴ്ച രാത്രി 11:30 ഓടെയാണ് (IST സമയം രാവിലെ 5) തീപിടിത്തം ആദ്യം റിപ്പോർട്ട് ചെയ്തത്, തുടർന്ന് അഗ്നിശമന സേനാംഗങ്ങൾക്ക് വിവരം ലഭിച്ചു. വെള്ളിയാഴ്ച പുലർച്ചെ 2 മണിക്ക് (IST സമയം രാവിലെ 7:30) വിമാനത്താവളം അടച്ചുപൂട്ടൽ പ്രഖ്യാപിച്ചു.
“വിമാനത്താവളത്തിലേക്ക് വൈദ്യുതി വിതരണം ചെയ്യുന്ന ഒരു സബ്സ്റ്റേഷനിലുണ്ടായ തീപിടുത്തത്തെത്തുടർന്ന്, ഹീത്രോയിൽ കാര്യമായ വൈദ്യുതി തടസ്സം നേരിടുന്നു. യാത്രക്കാരുടെയും സഹപ്രവർത്തകരുടെയും സുരക്ഷ ഉറപ്പാക്കാൻ, മാർച്ച് 21 ന് രാത്രി 11:59 വരെ ഹീത്രോ അടച്ചിടും. യാത്രക്കാർ വിമാനത്താവളത്തിലേക്ക് യാത്ര ചെയ്യരുതെന്നും കൂടുതൽ വിവരങ്ങൾക്ക് അവരുടെ എയർലൈനുമായി ബന്ധപ്പെടണമെന്നും നിർദ്ദേശിക്കുന്നു. അസൗകര്യത്തിൽ ഞങ്ങൾ ഖേദിക്കുന്നു,” ഹീത്രോ വിമാനത്താവളം പ്രഖ്യാപിച്ചു. സംഭവത്തിൽ എന്തെങ്കിലും തരത്തിലുള്ള അപാകതയില്ലെന്ന് പോലീസ് തള്ളിക്കളഞ്ഞെങ്കിലും അന്വേഷണം തുടരുകയാണ്. വൈദ്യുത വിതരണ ഉപകരണങ്ങളിൽ ശ്രദ്ധ കേന്ദ്രീകരിക്കുമെന്ന് ലണ്ടൻ ഫയർ ബ്രിഗേഡ് അറിയിച്ചു.