60 ജി എസ് എമ്മിന് മുകളിലുള്ള പ്ലാസ്റ്റിക് ക്യാരിബാഗുകൾ ഉപയോഗിക്കുന്നതിൽ ഇനി നിരോധനമില്ല. സംസ്ഥാനത്തെ പ്ലാസ്റ്റിക് ക്യാരിബാഗുകളുടെ ഉപയോഗം പൂർണമായി തടഞ്ഞുകൊണ്ട് സംസ്ഥാനസർക്കാർ നേരത്തെ ഉത്തരവിറക്കിയിരുന്നു. കേന്ദ്രനിയമം നിലനിൽക്കെ സംസ്ഥാനസർക്കാർ നിരോധനത്തിന് പ്രസക്തിയില്ലെന്ന വാദം അംഗീകരിച്ചാണ് സിംഗിൾ ബെഞ്ചിന്‍റെ നടപടി. സാധാരണ കടകളിൽ നൽകുന്ന ഒറ്റത്തവണ ഉപയോഗം മാത്രമുള്ള പ്ലാസ്റ്റിക് നിരോധനം പിൻവലിച്ചിട്ടില്ല. അറുപത് ജി എസ് എമ്മിന് താഴെയുളള ഒറ്റത്തവണ ഉപയോഗത്തിനുളള പ്ലാസ്റ്റിക് ക്യാരി ബാഗുകളുടെ നിരോധനം തുടരും. കേന്ദ്രസർക്കാർ കൊണ്ടുവന്ന നിയമഭേദഗതി നിലനിൽക്കെ സംസ്ഥാനസർക്കാരിന്‍റെ ഉത്തരവിന് നിയമപരമായി പ്രസക്തിയില്ല എന്നായിരുന്നു ഹൈക്കോടതിയിലെ ഹർജിയിലെ പ്രധാനവാദം. ഇത്തരം ക്യാരിബാഗ് നിർമാതാക്കളും ചില സ്വകാര്യ വ്യക്തികളുമാണ് കോടതിയെ സമീപിച്ചത്. കേന്ദ്രനിയമ ഭേദഗതി നിലനിൽക്കെ സംസ്ഥാനസർക്കാരിന്‍റെ ഉത്തരവിന് പ്രസക്തിയില്ലെന്ന കണ്ടെത്തലോടെയാണ് അറുപത് ജി എസ്എമ്മിന് മുകളിലുളള ക്യാരിബാഗുകളുടെ നിരോധനം റദ്ദാക്കിയത്.
തുണികടകളിലും മറ്റും ഉപയോഗിക്കുന്ന 60 ജി എസ് എമ്മിന് മുകളിലുള്ള ക്യാരിബാഗുകൾ ഉപയോഗിക്കാനുള്ള അനുമതി നൽകിക്കൊണ്ടുള്ള നിയമഭേദഗതി കേന്ദസർക്കാർ കൊണ്ടുവന്നിരുന്നു. ഇതിന് പിന്നാലെ സംസ്ഥാനത്തെ ചില ക്യാരിബാഗ് നിർമ്മാതാക്കളുൾപ്പെടെയുള്ളവർ ഹൈക്കോടതിയിൽ ഹർജി നൽകി. കേന്ദ്രസർക്കാറിന്റെ പുതിയ ഭേദഗതി നിലനിൽക്കെ പൂർണ്ണമായും എല്ലാ പ്ലാസ്റ്റിക് ബാഗുകളും നിരോധിച്ച സർക്കാറിന്റെ ഉത്തരവിന് നിയമപരമായ പ്രസക്തിയില്ല എന്ന് ചൂണ്ടിക്കാണിച്ചാണ് ഹർജി നൽകിയത്. ഈ ഹർജിയിൽ ആണ് ഹൈക്കോടതിയുടെ നടപടി.