നൊബേൽ സമ്മാന ജേതാവ് മുഹമ്മദ് യൂനസിന്റെ നേതൃത്വത്തിൽ ബംഗ്ലാദേശ് ഇടക്കാല സർക്കാർ എത്തുമെന്ന് റിപ്പോർട്ട്. വിദ്യാർത്ഥി പ്രതിഷേധങ്ങൾക്കിടയിൽ വലിയ ക്രമസമാധാന പ്രശ്നങ്ങൾ അരങ്ങേറുന്ന ഘട്ടത്തിലാണ് പുതിയ തീരുമാനം. ഈ നീക്കം താൽക്കാലികമായെങ്കിലും രാജ്യത്ത് സുരക്ഷ ഉറപ്പുവരുത്തുമെന്നാണ് വിലയിരുത്തൽ.
‘പാവപ്പെട്ടവരുടെ ബാങ്കർ’ എന്നറിയപ്പെടുന്ന, 84 കാരനായ യൂനുസിനെ നിയമിക്കണമെന്നാണ് പ്രതിഷേധക്കാരായ വിദ്യാർത്ഥികളും മുന്നോട്ടുവെയ്ക്കുന്ന ആവശ്യം. ബംഗ്ലാദേശ് പ്രസിഡന്റ് മുഹമ്മദ് ഷഹാബുദ്ദീന്റെ അധ്യക്ഷതയിൽ നടന്ന നിർണായക യോഗത്തിന് ശേഷമാണ് തീരുമാനം. വർഷങ്ങളായി ഹസീനയുടെ സ്ഥിരം വിമർശകനായ യൂനുസിനെതിരെ 190 ലധികം കേസുകളാണ് നിലനിൽക്കുന്നത്.
മുൻ പ്രധാനമന്ത്രി ഷെയ്ഖ് ഹസീന രാജിവച്ച് ഒരു മണിക്കൂറിനുള്ളിൽ ബംഗ്ലാദേശിൽ നിന്ന് പലായനം ചെയ്ത ശേഷം ഇന്ത്യയിൽ അഭയംതേടിയെങ്കിലും രാജ്യത്ത് സ്ഥിതിഗതികൾ അസ്ഥിരമായി തുടർന്നു. വർഷങ്ങളായി ഹസീനയുടെ സ്ഥിരം വിമർശകനായ യൂനുസിനെതിരെ 190 ലധികം കേസുകളാണ് നിലനിൽക്കുന്നത്. ദശലക്ഷക്കണക്കിന് ആളുകളെ ദാരിദ്ര്യത്തിൽ നിന്ന് കരകയറ്റുന്നതിൽ ‘ഗ്രാമീൺ ബാങ്ക്’ വഴി നടത്തിയ പയനിയറിംഗ് പ്രവർത്തനത്തിന് 2006 ലെ സമാധാനത്തിനുള്ള നോബൽ സമ്മാനം അദ്ദേഹത്തിന് ലഭിച്ചു.
ബംഗ്ലാദേശ് പ്രസിഡന്റ് മുഹമ്മദ് ഷഹാബുദ്ദീൻ പാർലമെന്റ് പിരിച്ചുവിട്ട് ഇടക്കാല സർക്കാരിനും പുതിയ തിരഞ്ഞെടുപ്പിനും വഴിയൊരുക്കി. മെഡിക്കൽ നടപടിക്രമങ്ങൾക്കായി ഇപ്പോൾ പാരീസിലുള്ള യൂനുസ് ഉടൻ തന്നെ ധാക്കയിലേക്ക് മടങ്ങുമെന്ന് പ്രതീക്ഷിക്കുന്നു. നൊബേൽ ജേതാവിനെ ഇടക്കാല സർക്കാരിൻ്റെ മുഖ്യ ഉപദേഷ്ടാവാക്കാനുള്ള പ്രതിഷേധ വിദ്യാർത്ഥികളുടെ നിർദ്ദേശം ചൊവ്വാഴ്ചത്തെ യോഗത്തിൽ അംഗീകരിച്ചു. പ്രതിഷേധത്തിന് നേതൃത്വം നൽകുന്ന വിദ്യാർത്ഥികളും ത്രിസേനാ മേധാവികളും പങ്കെടുത്തു.
അതിനിടെ, ഷെയ്ഖ് ഹസീനയുടെ പ്രധാനമന്ത്രിസ്ഥാനം രാജിവയ്ക്കുകയും തുടർന്ന് ബംഗ്ലാദേശിൽ നിന്ന് രക്ഷപ്പെടുകയും ചെയ്തത് അവരുടെ രാഷ്ട്രീയ എതിരാളിയായ ബംഗ്ലാദേശ് നാഷണലിസ്റ്റ് പാർട്ടിയുടെ നേതാവ് ബീഗം ഖാലിദ സിയയുടെ ജയിൽ മോചനത്തിനും വഴി തെളിച്ചു . സിയയെ വീട്ടുതടങ്കലിൽ നിന്ന് മോചിപ്പിച്ചതായി പ്രസിഡന്റ് ഷഹാബുദ്ദീന്റെ ഓഫീസ് അറിയിച്ചു.