ബെയ്റൂട്ടിലെ തീവ്രവാദ ഗ്രൂപ്പിന്റെ ആസ്ഥാനത്ത് ഇസ്രായേൽ നടത്തിയ വ്യോമാക്രമണത്തെ തുടർന്ന് കൊല്ലപ്പെട്ട ഹിസ്ബുള്ളയുടെ ഉന്നത നേതാവ് ഹസൻ നസ്റല്ലയുടെ ശവസംസ്കാരം നാളെ നടക്കുമെന്ന് റിപ്പോർട്ടുകൾ. ഇസ്രായേലുമായി ഹിസ്ബുള്ളയുടെ ശത്രുത രൂക്ഷമായ സാഹചര്യത്തിൽ യുഎൻ സുരക്ഷാ കൗൺസിൽ അടിയന്തരമായി യോഗം ചേരണമെന്നും ഇറാൻ ആവശ്യപ്പെട്ടിട്ടുണ്ട്. വിയോഗത്തെത്തുടർന്ന് ലെബനൻ അഞ്ച് ദിവസത്തെ ദുഃഖാചരണം പ്രഖ്യാപിച്ചിരുന്നു. നസ്റല്ലയുടെ കൊലപാതകം ദീർഘകാലമായി തുടരുന്ന സംഘർഷത്തിൽ വലിയ വർദ്ധനവുണ്ടായിട്ടുണ്ട് എന്നാണ് റിപോർട്ടുകൾ.
നസ്റല്ലയുടെ തിരോധാന വാർത്ത പുറത്ത് വന്നതിന് പിന്നാലെ ഇറാനിൽ പ്രതിഷേധമുയർന്നിരുന്നു. കൊല്ലപ്പെട്ട ഹിസ്ബുള്ള കമാൻഡറുടെ ഫോട്ടോഗ്രാഫുകൾ പിടിച്ച് പ്രകടനക്കാർ “ഡൌൺ വിത്ത് യു.എസ്”, “ഡൌൺ വിത്ത് ഇസ്രായേൽ”, “പ്രതികാരം” എന്നിങ്ങനെ എന്നിങ്ങനെ മുദ്രാവാക്യം വിളിച്ചാണ് പ്രകടനം നടത്തിയത്. നസ്റല്ലയുടെ കൊലപാതകത്തെ തുടർന്ന് ഇസ്രായേലിന്റെ പല ഭാഗങ്ങളിലും സൈറൺ മുഴങ്ങി. ലെബനൻ വിക്ഷേപിച്ച ഒരു പ്രൊജക്ടൈൽ ഇസ്രായേൽ അധിനിവേശ വെസ്റ്റ്ബാങ്ക് പ്രദേശത്തേക്ക് പതിച്ചെങ്കിലും പരിക്കുകളൊന്നും റിപ്പോർട്ട് ചെയ്തിട്ടില്ല. ജറുസലേമിന്റെ പ്രാന്തപ്രദേശങ്ങളിലും സൈറണുകൾ മുഴങ്ങി.
നസ്റല്ലയുടെ കൊലപാതകത്തിന് തൊട്ടുപിന്നാലെ, ഇസ്രായേൽ സൈന്യവും ഇസ്രായേലിലെ സിവിലിയൻ സൈറ്റുകളും ലക്ഷ്യമിടുന്നതായി കണ്ടെത്തുന്നതിന് ചുമതലപ്പെടുത്തിയ ഹിസ്ബുള്ളയുടെ രഹസ്യാന്വേഷണ വിഭാഗത്തിലെ ഒരു യൂണിറ്റിൻ്റെ തലവനായ ഹസ്സൻ ഖലീൽ യാസിനേയും ഇല്ലാതാക്കിയതായി ഇസ്രായേൽ സൈന്യം അവകാശപ്പെട്ടു.
നസ്റല്ലയുടെ ബന്ധുവായ ഹാഷിം സഫീദ്ദീൻ ഹിസ്ബുള്ള മേധാവിയായി ചുമതലയേൽക്കുമെന്ന് ഇറാൻ പിന്തുണയുള്ള തീവ്രവാദി സംഘടന അറിയിച്ചു. നിയന്ത്രണത്തിനുള്ള അന്താരാഷ്ട്ര അഭ്യർത്ഥനകൾക്കിടയിലും തെക്കൻ ലെബനനിൽ “ടാർഗെറ്റഡ് ഗ്രൗണ്ട് റെയ്ഡുകൾ” ആരംഭിച്ചതായി തിങ്കളാഴ്ച രാത്രി ഇസ്രായേൽ പ്രഖ്യാപിച്ചു.
പ്രതികാരമായി, ലെബനനിൽ നിന്ന് വടക്കൻ ഇസ്രായേലിലേക്ക് 100 ലധികം റോക്കറ്റുകൾ തൊടുത്തുവിട്ടു. എന്നാൽ, പരിക്കുകളൊന്നും റിപ്പോർട്ട് ചെയ്തിട്ടില്ലെന്ന് ഇസ്രായേൽ സൈന്യം അവകാശപ്പെട്ടു. സെൻട്രൽ ബെയ്റൂട്ടിനെ ലക്ഷ്യമിട്ട് ഇസ്രായേൽ ഒറ്റരാത്രികൊണ്ട് നടത്തിയ ആക്രമണത്തിൽ ആറ് പേർ മരിക്കുകയും എട്ട് പേർക്ക് പരിക്കേൽക്കുകയും ചെയ്തു. കഴിഞ്ഞ 24 മണിക്കൂറിനുള്ളിൽ ലെബനനിലുടനീളം ഇസ്രായേൽ നടത്തിയ ആക്രമണങ്ങളിൽ 46 പേർ കൊല്ലപ്പെടുകയും 85 പേർക്ക് പരിക്കേൽക്കുകയും ചെയ്തതായി ലെബനൻ ആരോഗ്യ മന്ത്രാലയം അറിയിച്ചു.