ഹരിയാനയിലെ വർഗ്ഗീയ സംഘർഷങ്ങളുടെ കേന്ദ്രമായി പ്രവർത്തിച്ച നുഹിലെ അനധികൃത നിർമ്മാണങ്ങൾ സർക്കാർ പൊളിച്ചു നീക്കി. ഇന്ന് പുലർച്ചെയാണ് നടപടികൾ തുടങ്ങിയത്. ഹരിയാന മുഖ്യമന്ത്രി മനോഹർ ലാൽ ഖട്ടാറിന്റെ നിർദേശ പ്രകാരമാണ് പൊളിച്ചു നീക്കുന്നതെന്ന് നുഹിന്റെ എസ്ഡിഎം അശ്വിനി കുമാർ വ്യക്തമാക്കി. നുഹിന്റെ എസ്കെഎം ഗവൺമെന്റ് മെഡിക്കൽ കോളേജിന് സമീപമുള്ള കെട്ടിടങ്ങളും കുടിലുകളുമാണ് പൊളിച്ചു നീക്കിയത്. അനിഷ്ട സംഭവങ്ങൾ ഉണ്ടാകാതിരിക്കാൻ കനത്ത പൊലീസ് സന്നാഹത്തിന് ഇടയിലാണ് പൊളിക്കൽ നടപടി. അതേസമയം നടപടികൾ സംബന്ധിച്ച് നൂഹ് ഭരണകൂടം ഔദ്യോഗിക പ്രസ്താവനകളൊന്നും പുറപ്പെടുവിച്ചിട്ടില്ല.
കഴിഞ്ഞ ദിവസം പ്രദേശത്ത് അനധികൃത കുടിയേറ്റക്കാരുടെ കൈയേറ്റം നശിപ്പിച്ചിരുന്നു. ഹരിയാന അർബൻ ഡെവലപ്മെന്റ് അതോറിറ്റിയാണ് പൊളിച്ചു നീക്കൽ നടത്തിയത്. ജൂലൈ 31ന് പ്രദേശത്ത് നടന്ന കലാപത്തിൽ ഉൾപ്പെട്ടവരാണ് ഈ സ്ഥാപനങ്ങളിലെ താമസക്കാരെന്ന് പോലീസ് സ്ഥിരീകരിച്ചു. നൽഹാർ ക്ഷേത്രത്തിലേക്കുള്ള വഴിയിൽ ആശുപത്രിക്ക് മുന്നിലെ അനധികൃത കൈയേറ്റങ്ങളും അധികൃതർ ഇന്ന് രാവിലെ ബുൾഡോസർ ഉപയോഗിച്ച് പൊളിച്ചു നീക്കിയിരുന്നു.