കേരളാ കോൺഗ്രസ് (എം) നേതാവ് ജോസ് കെ മാണിക്കെതിരെ പാലായിൽ ഫ്ലക്സ് ബോർഡുകൾ. തിരഞ്ഞെടുപ്പ് രാഷ്ട്രീയത്തെ ഭയക്കുന്ന ജോസ് കെ മാണി പാലായ്ക്ക് അപമാനം, അഡ്വ ബിനു പുളിക്കക്കണ്ടത്തിന് അഭിവാദ്യങ്ങൾ എന്നെഴുതിയ ബോർഡാണ് പാലാ വലിയ പാലത്തിനോട് ചേർന്ന് സ്ഥാപിച്ചിരിക്കുന്നത്. പാലാ പൗരാവലിയുടെ പേരിലാണ് ഫ്ലക്സ് ബോർഡ്.
പാലാ നഗരസഭയിലെ സിപിഎം കൗൺസിലർ ബിനു പുളിക്കക്കണ്ടത്തിനെ പാർട്ടിയിൽ നിന്ന് പുറത്താക്കിയതിന് പിന്നാലെയാണ് ബോർഡുകൾ പ്രത്യക്ഷപ്പെട്ടത്. സിപിഎം തന്നെ പുറത്താക്കിയത് ചില ആളുകളുടെ താല്പര്യങ്ങൾ കണക്കിലെടുത്താണെന്ന് പാലാ മുനിസിപ്പൽ കൗൺസിലർ ബിനു പുളിക്കകണ്ടം പറഞ്ഞു. രാഷ്ട്രീയം അഭയം തേടി വന്ന ജോസ് കെ മാണിയെ സിപിഎം സംരക്ഷിക്കുന്നുവെന്നും ബിനു ആരോപിച്ചു. ജോസ് കെ മാണിയുടെ സമ്മർദ്ദത്തിനു വഴങ്ങി ആണ് പാർട്ടി നടപടി എടുത്തത്, ജോസ് കെ മാണിക്കെതിരെ പറഞ്ഞതിൽ ഉറച്ചു നിൽക്കുന്നുവെന്നും ബിനു പറഞ്ഞു. പാർട്ടിയുടെ വെറും ബ്രാഞ്ച് അംഗത്തെ വേണോ ഒരു രാഷ്ട്രീയ പാർട്ടിയുള്ള ജോസ് കെ മാണിയെ വേണോ എന്ന് പാർട്ടിക്ക് തോന്നിയിട്ടുണ്ടാകുമെന്നും ബിനു മാധ്യമങ്ങളോട് പറഞ്ഞു.