ഒരിടവേളയ്ക്ക് ശേഷം ദേശീയ തലസ്ഥാനത്തേക്ക് വീണ്ടും ‘ഡൽഹി ചലോ’ കാൽനട മാർച്ച് ആരംഭിച്ച് കർഷകർ. നൂറോളം കർഷകർ ശംഭു അതിർത്തിയിൽ നിന്നാണ് മാർച്ച് ആരംഭിച്ചത്. കർഷക സംഘടനാ നേതാക്കളായ സർവാൻ സിംഗ് പന്ദേർ, ജഗ്ജിത് സിംഗ് ദല്ലെവാൾ എന്നിവരുടെ നേതൃത്വത്തിലാണ് പ്രതിഷേധ മാർച്ച്. മിനിമം താങ്ങുവിലയ്ക്ക് (എംഎസ്പി) നിയമപരമായ ഉറപ്പ്, ലഖിംപൂർ ഖേരി അക്രമത്തിൻ്റെ ഇരകൾക്ക് നീതി എന്നിവ ഉൾപ്പെടെ 12 ആവശ്യങ്ങൾ ഉന്നയിച്ചാണ് കർഷകരുടെ പ്രതിഷേധം.

“കഴിഞ്ഞ എട്ട് മാസമായി ഞങ്ങൾ ഇവിടെ ഇരിക്കുകയാണ്. കാൽനടയായി ഡൽഹിയിലേക്ക് മാർച്ച് ചെയ്യാൻ ഞങ്ങൾ തീരുമാനിച്ചു. ഖാപ് പഞ്ചായത്തുകളിൽ നിന്നും വ്യാപാരി സമൂഹത്തിലെ അംഗങ്ങളിൽ നിന്നും ഈ പ്രസ്ഥാനത്തിന് പിന്തുണ ലഭിച്ചിട്ടുണ്ട്”- കർഷക സംഘടനാ നേതാക്കളിൽ ഒരാളായ സർവാൻ സിംഗ് പന്ദേർ പറഞ്ഞു.

അതേസമയം ഹരിയാന സർക്കാർ അംബാലയിലെ ക്രിമിനൽ നടപടി ചട്ടത്തിൻ്റെ (സിആർപിസി) സെക്ഷൻ 144 പ്രകാരം നിരോധന ഉത്തരവുകൾ ഏർപ്പെടുത്തി, പൊതുയോഗങ്ങളും ഘോഷയാത്രകളും നിയന്ത്രിച്ചിട്ടുണ്ട്. അർധസൈനിക വിഭാഗങ്ങൾ, ഡ്രോണുകൾ, ജലപീരങ്കികൾ എന്നിവയുടെ വിന്യാസം ഉൾപ്പെടെയുള്ള സുരക്ഷാ സംവിധാനങ്ങൾ സ്ഥലത്ത് ഒരുക്കിയിട്ടുണ്ട്. അനാവശ്യമായി ഇടപെടാതെ മാർച്ച് നടത്താൻ അനുവദിക്കണമെന്ന് കർഷകർ സർക്കാരിനോട് ആവശ്യപ്പെട്ടു. “പ്രതിഷേധിക്കാനുള്ള ഞങ്ങളുടെ ജനാധിപത്യ അവകാശം വിനിയോഗിക്കാൻ സർക്കാർ അനുവദിക്കണമെന്ന് ഞങ്ങൾ ആഗ്രഹിക്കുന്നു,” പാന്ദർ പറഞ്ഞു.

കേന്ദ്ര സർക്കാരുമായുള്ള ആശയവിനിമയം മാസങ്ങളായി നിലച്ചതിന് ശേഷമാണ് മാർച്ച് നടത്തുന്നത്. “ഫെബ്രുവരിയിൽ, ഞങ്ങൾ നാല് റൗണ്ട് ചർച്ചകൾ നടത്തി, എന്നാൽ ഫെബ്രുവരി 18 മുതൽ കൂടുതൽ സംഭാഷണങ്ങളൊന്നും ഉണ്ടായിട്ടില്ല,” കർഷകരുടെ ആശങ്കകൾ പരിഹരിക്കുന്നതിന് പുതിയ ചർച്ചകൾക്ക് ആഹ്വാനം ചെയ്തുകൊണ്ട് പന്ദർ കുറിച്ചു.