ഡോ. വന്ദന ദാസ് കൊലപാതകത്തില്‍ നിര്‍ണായക മെഡിക്കൽ റിപ്പോര്‍ട്ട് പുറത്ത്. സംഭവ സമയത്ത് പ്രതി സന്ദീപ് ലഹരി വസ്‌തുക്കൾ ഉപയോഗിച്ചിട്ടില്ലെന്നാണ് മെഡിക്കൽ റിപ്പോർട്ടിൽ ഉള്ളത്. രക്തം, മൂത്രം എന്നിവയിൽ മദ്യത്തിന്റെയോ ലഹരി വസ്‌തുക്കളുടെയോ സാന്നിദ്ധ്യമില്ല. ഫോറൻസിക് പരിശോധന ഫലം കോടതിക്ക് കൈമാറി. പ്രതിക്ക് കാര്യമായ മാനസിക പ്രശ്‌നമില്ലെന്നും മെഡിക്കൽ ബോർഡ് വ്യക്തമാക്കി.
പത്ത് ദിവസത്തെ ചികിത്സയ്ക്ക് ശേഷംപ്രതി സന്ദീപിനെ മെഡിക്കൽ കോളേജ് ആശുപത്രിയിൽ നിന്നും പൂജപ്പുര സെൻട്രൽ ജയിലിൽ എത്തിച്ചിരുന്നു. ഈ ദിവസങ്ങളിൽ മെഡിക്കൽ ബോർഡിന്റെ നിരീക്ഷണത്തിൽ കഴിഞ്ഞിരുന്ന സന്ദീപിന് മാനസിക പ്രശ്നങ്ങൾ ഇല്ലെന്നാണ് മെഡിക്കൽ ബോർഡ് പറയുന്നത്.
സന്ദീപിനെ പോലീസ് ആശുപത്രിയിലെത്തിക്കുമ്പോൾ വന്ദനയെ കൊലപ്പെടുത്താനും മറ്റ് ആളുകളെ കുത്തി മുറിവേൽപിക്കാനും കാരണമായത് സന്ദീപിനുള്ളിലെ ലഹരി ആയിരുന്നു എന്നായിരുന്നു സംശയം ഉണ്ടായിരുന്നത്.