ഏഷ്യയിലെ ഏറ്റവും വലിയ കലാമാമാങ്കമായ സംസ്ഥാന കൗമാരകലയ്ക്ക് തുടക്കമായി. രാവിലെ 10 മണിക്ക് കോഴിക്കോട് വിക്രം മൈതാനിയിലെ അതിരാണിപ്പാടം എന്ന് പേരിട്ട മുഖ്യ വേദിയിൽ കലോത്സവദീപം കൊളുത്തി മുഖ്യമന്ത്രി പിണറായി വിജയൻ കലാമേള ഉദ്ഘാടനം ചെയ്തു. കലോത്സവത്തിന്റെ പ്രധാന വേദിയായ വെസ്റ്റ്ഹിൽ വിക്രം മൈതാനം അടക്കം 24 വേദികളാണ് കലോത്സവത്തിന് സജ്ജീകരിച്ചിട്ടുള്ളത്.
മാറുന്നകാലത്തേക്ക് പിടിച്ച കണ്ണാടിയാവുകയാണ് കലോത്സവമെന്ന് മുഖ്യമന്ത്രി പറഞ്ഞു.സാമൂഹ്യ വിമർശനത്തിന്റേയും നവീകരണത്തിന്റേയും ചാലുകീറാനായി വിദ്യാർഥികൾ കലാരൂപങ്ങളെ മാറ്റുന്ന സാംസ്കാരിക ഉൽസവം.വിജയിക്കലല്ല പങ്കെടുക്കുന്നതിലാണ് കാര്യം.പങ്കെടുക്കുന്നത് തന്നെ വലിയ അംഗീകാരമായി കണക്കാക്കുന്ന സംസ്കാരം കുട്ടികളും രക്ഷിതാക്കളും വളർത്തിയെടുക്കണം എന്നും പിണറായി വിജയൻ പറഞ്ഞു. കാലാനുസൃതമായി കലോത്സവ മാന്വൽ പരിഷ്കരിക്കുമെന്ന് വിദ്യാഭ്യാസമന്ത്രി വി ശിവന്കുട്ടി പറഞ്ഞു.ഗോത്രകലകളെ കലോത്സവത്തിൽ ഉൾപ്പെടുത്തുന്ന കാര്യം പരിഗണനയിലുണ്ടെന്നും അദ്ദേഹം വ്യക്തമാക്കി. കോഴിക്കോടിന്റെ ചുമതലയുള്ള മന്ത്രി പി എ മുഹമ്മദ് റിയാസ് സ്ഥിതിഗതികൾ വിലയിരുത്താൻ ജില്ലയിൽ ക്യാമ്പ് ചെയ്യുന്നുണ്ട്.
ആദ്യ ദിവസം എല്ലാ വേദികളിലും രാവിലെ 11 മണിക്കും മറ്റുള്ള ദിവസങ്ങളിൽ രാവിലെ 9 മണിക്കും ആയിരിക്കും മത്സരങ്ങൾ ആരംഭിക്കുക. മത്സരവേദിക്ക് അരികിൽ തത്സമയ പ്രദർശനത്തിനായി ഡിജിറ്റൽ സൗകര്യം ഏർപ്പെടുത്തിയിട്ടുണ്ട്. എല്ലാ മത്സരങ്ങളുടെയും വീഡിയോ റെക്കോർഡിങ് ഉണ്ടായിരിക്കും. കേരളത്തിന് അകത്തും പുറത്തുമുള്ള വിധികർത്താക്കൾ ആയിരിക്കും മത്സരം വിലയിരുത്തുന്നത്. കലാകാരന്മാർക്ക് യാത്ര സൗകര്യത്തിനായി മുപ്പത് കലോത്സവവണ്ടികളും തയ്യാറായിട്ടുണ്ട്. അഞ്ച് ദിവസം കൊണ്ട് 24 വേദികളിലായി 239 ഇനങ്ങളിൽ കൗമാര പ്രതിഭകൾ മാറ്റുരയ്ക്കും.
എല്ലാ വേദികളിലും മെഡിക്കൽ ടീമിന്റെ സേവനം ലഭ്യമാണ്. മൊബൈൽ മെഡിക്കൽ യൂണിറ്റ് സൗകര്യങ്ങൾ ഒരുക്കിയ ആംബുലൻസ് ഉൾപ്പെടെയുള്ള സൗകര്യങ്ങളാണ് ആരോഗ്യവകുപ്പ് ഒരുക്കിയിരിക്കുന്നത്. വേദികളിൽ സുരക്ഷ ഉറപ്പുവരുത്തുന്നതിനായി അഗ്നിശമനസേന മുഴുവൻ സമയവും ഉണ്ടാകും. വിക്രം മൈതാനത്ത് മാത്രമായി രണ്ട് യൂണിറ്റ് സംഘം നിലയുറപ്പിച്ചിട്ടുണ്ട്. മത്സരം നടക്കുന്ന വേദികളിൽ വൈദ്യുത തടസ്സം നേരിടാതിരിക്കാൻ കെഎസ്ഇബിയും രംഗത്ത് എത്തിയിട്ടുണ്ട്. കലാകാരന്മാർക്കും കാണികൾക്കും വേണ്ടി ജലവകുപ്പിന്റെ നേതൃത്വത്തിൽ ശുദ്ധജല വിതരണവും ഒരുക്കിയിട്ടുണ്ട്.