ബംഗ്ലാദേശിൽ രണ്ട് പതിറ്റാണ്ടിന് ശേഷം ഭരണം തിരിച്ചുപിടിച്ച് താരിഖ് റഹ്മാന്റെ നേതൃത്വത്തിലുള്ള ബി.എൻ.പി. 2024 ഓഗസ്റ്റിൽ ഷെയ്ഖ് ഹസീന സർക്കാർ പുറത്തായതിന് ശേഷം നടന്ന ആദ്യ പൊതുതിരഞ്ഞെടുപ്പിൽ ബി.എൻ.പി സഖ്യം വൻ വിജയം ഉറപ്പിച്ചു. ബംഗ്ലാദേശിലെ 299 പാർലമെന്റ് സീറ്റുകളിലേക്ക് നടന്ന തിരഞ്ഞെടുപ്പിലെ അനൗദ്യോഗിക ഫലസൂചനകൾ പ്രകാരം ബി.എൻ.പി സഖ്യം കേവലഭൂരിപക്ഷം മറികടന്നു.
രാജ്യത്തെ 300 മണ്ഡലങ്ങളിൽ 299 എണ്ണത്തിലാണ് വോട്ടെടുപ്പ് നടന്നത്. പാർലമെന്ററി സ്ഥാനാർത്ഥിയുടെ മരണത്തെത്തുടർന്ന് ഷേർപൂർ -3 ലെ വോട്ടെടുപ്പ് മാറ്റിവച്ചു. രാജ്യവ്യാപകമായി 42,659 പോളിംഗ് സ്റ്റേഷനുകളിലെ സുതാര്യമായ ബാലറ്റ് ബോക്സുകളിൽ സ്ഥാപിച്ച രണ്ട് വ്യത്യസ്ത ബാലറ്റ് പേപ്പറുകൾ – ഒന്ന് പാർലമെന്റ് തിരഞ്ഞെടുപ്പിനും മറ്റൊന്ന് റഫറണ്ടത്തിനും – വോട്ടർമാർ ഉപയോഗിച്ചു.
കേവലഭൂരിപക്ഷത്തിന് 151 സീറ്റുകളാണ് വേണ്ടത്. 200-ലധികം സീറ്റുകൾ നേടി ബി.എൻ.പി കരുത്തുറ്റ പ്രകടനമാണ് കാഴ്ചവെച്ചത്. ബി.എൻ.പി ചെയർമാൻ താരിഖ് റഹ്മാൻ മത്സരിച്ച ധാക്ക-17, ബോഗുറ-6 എന്നീ രണ്ട് മണ്ഡലങ്ങളിലും വൻ ഭൂരിപക്ഷത്തോടെ വിജയിച്ചു. 20 വർഷത്തെ ഇടവേളയ്ക്ക് ശേഷം ബി.എൻ.പി സർക്കാർ രൂപീകരിക്കുമ്പോൾ താരിഖ് റഹ്മാൻ പ്രധാനമന്ത്രി പദത്തിലെത്തുമെന്നാണ് പാർട്ടി വൃത്തങ്ങൾ നൽകുന്ന സൂചന.
2001-ൽ അവസാനമായി തിരഞ്ഞെടുപ്പിൽ വിജയിച്ച താരിഖ് റഹ്മാന്റെ നേതൃത്വത്തിൽ, വോട്ടെണ്ണൽ പ്രവണതകൾ വൻ ഭൂരിപക്ഷത്തിലേക്ക് വിരൽ ചൂണ്ടിയതോടെ പാർട്ടി വിജയം പ്രഖ്യാപിച്ചു. അതേസമയം, ജമാഅത്തെ ഇസ്ലാമിക്ക് കനത്ത തിരിച്ചടി നേരിട്ടു, ഫലങ്ങൾ തുടർച്ചയായി വന്നതോടെ രണ്ടക്ക സീറ്റുകളിൽ ഒതുങ്ങി.
ബംഗ്ലാദേശ് തിരഞ്ഞെടുപ്പ് കമ്മീഷൻ ഇതുവരെ ഔദ്യോഗിക ഫലങ്ങൾ പുറത്തുവിട്ടിട്ടില്ല. അതേസമയം തുടക്കത്തിൽ ഏറെക്കുറെ സമാധാനപരമായിരുന്നു എന്ന് അധികാരികൾ വിശേഷിപ്പിച്ച തിരഞ്ഞെടുപ്പിൽ ബംഗ്ലാദേശിന്റെ പല ഭാഗങ്ങളിലും അക്രമങ്ങൾ പൊട്ടിപ്പുറപ്പെട്ടു. വോട്ടെടുപ്പുമായി ബന്ധപ്പെട്ട ഏറ്റുമുട്ടലുകളിൽ 70 ലധികം പേർക്ക് പരിക്കേറ്റതായി പ്രാദേശിക മാധ്യമങ്ങൾ റിപ്പോർട്ട് ചെയ്തു. 14 വ്യത്യസ്ത സംഭവങ്ങളിലായി കുറഞ്ഞത് 72 പേർക്ക് പരിക്കേറ്റതായി ബംഗ്ലാദേശി ദിനപത്രമായ ദി ഡെയ്ലി സ്റ്റാർ റിപ്പോർട്ട് ചെയ്തു. നോഖാലി ജില്ലയിലെ ഹാതിയയിലാണ് ഏറ്റവും മോശം അക്രമം റിപ്പോർട്ട് ചെയ്യപ്പെട്ടത്, ബിഎൻപിയുടെയും നാഷണൽ സിറ്റിസൺ പാർട്ടിയുടെയും അനുയായികൾ തമ്മിലുള്ള സംഘർഷത്തിൽ 31 പേർക്ക് പരിക്കേറ്റു.