മദ്യനയവുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ ഡൽഹി മുഖ്യമന്ത്രി അരവിന്ദ് കെജ്രിവാളിനെ റൂസ് അവന്യൂ കോടതി 6 ദിവസത്തെ എൻഫോഴ്സ്മെന്റ് ഡയറക്ടറേറ്റ് കസ്റ്റഡിയിൽ വിട്ടു. മാർച്ച് 28 വരെ കേജ്രിവാൾ അന്വേഷണ ഏജൻസിയുടെ കസ്റ്റഡിയിൽ തുടരും. മാർച്ച് 28ന് ഉച്ചയ്ക്ക് അരവിന്ദ് കെജ്രിവാളിനെ കോടതിയിൽ ഹാജരാക്കും.
എക്‌സൈസ് പോളിസി കേസിൽ എൻഫോഴ്‌സ്‌മെൻ്റ് ഡയറക്ടറേറ്റ് അറസ്റ്റ് ചെയ്തതിനെതിരായ ഹർജി വ്യാഴാഴ്ച വൈകുന്നേരം സുപ്രീം കോടതിയിൽ നിന്ന് പിൻവലിച്ചതിന് തൊട്ടുപിന്നാലെയാണ് കെജ്രിവാളിനെ വിചാരണ കോടതിയിൽ ഹാജരാക്കിയത്. ഡൽഹി എക്‌സൈസ് നയം 2021-22 രൂപീകരിക്കുന്നതിനും നടപ്പാക്കുന്നതിനുമായി ‘സൗത്ത് ഗ്രൂപ്പിൽ’ നിന്ന് കെജ്‌രിവാളിന് കോടിക്കണക്കിന് രൂപ കോഴയായി ലഭിച്ചെന്ന് റിമാൻഡ് ഹിയറിംഗിനിടെ ഫെഡറൽ അന്വേഷണ ഏജൻസി ആരോപിച്ചു.
ഗോവ തെരഞ്ഞെടുപ്പിൽ മത്സരിക്കുന്നതിനായി സൗത്ത് ഗ്രൂപ്പിലെ ചില പ്രതികളിൽ നിന്ന് 100 കോടി രൂപയാണ് ഇയാൾ ആവശ്യപ്പെട്ടതെന്ന് ഏജൻസിക്ക് വേണ്ടി ഹാജരായ അഡീഷണൽ സോളിസിറ്റർ ജനറൽ (എഎസ്ജി) എസ് വി രാജു റൂസ് അവന്യൂ കോടതിയെ അറിയിച്ചു. ഗോവ തിരഞ്ഞെടുപ്പിൽ ഉപയോഗിച്ച 45 കോടി കോഴ പെെസ നാല് ഹവാല വഴികളിൽ നിന്നാണെന്ന് മണി ട്രയൽ കാണിക്കുന്നതായും രാജു അവകാശപ്പെട്ടു.
അതേസമയം, അരവിന്ദ് കെജ്‌രിവാളിന് വേണ്ടി ഹാജരായ മുതിർന്ന അഭിഭാഷകൻ അഭിഷേക് മനു സിംഗ്വി റിമാൻഡ് ഹർജിയെ എതിർക്കുകയും ഡൽഹി മുഖ്യമന്ത്രിയെ അറസ്റ്റ് ചെയ്യേണ്ടതിൻ്റെ ആവശ്യകത അന്വേഷണ ഏജൻസി കാണിക്കേണ്ടതുണ്ടെന്നും വാദിച്ചു. അറസ്റ്റിൻ്റെ അധികാരവും അറസ്റ്റിൻ്റെ ആവശ്യകതയും രണ്ട് വ്യത്യസ്ത കാര്യങ്ങളാണെന്നും സിംഗ്വി വാദിച്ചു.
75 വർഷത്തെ സ്വാതന്ത്ര്യ ചരിത്രത്തിൽ ഇതാദ്യമായാണ് ഒരു സിറ്റിംഗ് മുഖ്യമന്ത്രി അറസ്റ്റിലാകുന്നത്, ഇതാദ്യമായാണ് അദ്ദേഹത്തിൻ്റെ പാർട്ടിയിലെ നാല് നേതാക്കൾ അറസ്റ്റിലാകുന്നതെന്നും മുതിർന്ന അഭിഭാഷകൻ ചൂണ്ടിക്കാട്ടി. “ആദ്യ വോട്ട് രേഖപ്പെടുത്തുന്നതിന് മുമ്പ് തിരഞ്ഞെടുപ്പ് ഫലം ലഭിക്കുന്നത് പോലെയാണ് ഇത്,” അദ്ദേഹം കൂട്ടിച്ചേർത്തു.