ലോക്സഭാ തെരഞ്ഞെടുപ്പിനുള്ള കോൺഗ്രസിൻ്റെ നാലാം സ്ഥാനാർത്ഥി പട്ടിക പുറത്തിറക്കി. 46 ലോക്സഭാ സ്ഥാനാർത്ഥികളുടെ നാലാമത്തെ പട്ടികയാണ് കോൺഗ്രസ് ശനിയാഴ്ച പ്രഖ്യാപിച്ചത്. മധ്യപ്രദേശ് മുൻ മുഖ്യമന്ത്രി ദിഗ്‌വിജയ സിംഗ് രാജ്ഗഡ് മണ്ഡലത്തിൽ നിന്നും അജയ് റായി വാരണാസിയിൽ പ്രധാനമന്ത്രി നരേന്ദ്ര മോദിക്കെതിരെയും മത്സരിക്കും. പാർട്ടി നേതാവ് ദിഗ്‌വിജയ സിംഗ്, നേതാക്കളായ അജയ് റായ്, കാർത്തി പി ചിദംബരം എന്നിവരുൾപ്പെടെ മത്സരരംഗത്തുണ്ട്.
ഉത്തർപ്രദേശ് എംഎൽഎയായ ഇമ്രാൻ മസൂദിനെ സഹരൻപൂർ മണ്ഡലത്തിലേക്കും അലോക് മിശ്ര കാൺപൂരിലേക്കും സ്ഥാനാർത്ഥിയായി പ്രഖ്യാപിച്ചു. മുൻ ഉത്തരാഖണ്ഡ് മുഖ്യമന്ത്രി ഹരീഷ് റാവത്തിൻ്റെ മകൻ വീരേന്ദ്ര റാവത്തിന് ഹരിദ്വാർ ലോക്സഭാ സീറ്റിൽ നിന്നും കോൺഗ്രസ് നേതാവ് പിഎൽ പുനിയയുടെ മകൻ തനൂജ് പുനിയക്ക് ഉത്തർപ്രദേശിലെ ബാരാ ബാങ്കിയിൽ നിന്നും ലോക്സഭാ ടിക്കറ്റ് നൽകി.
കോൺഗ്രസ് നേതാവും മുൻ കേന്ദ്രമന്ത്രിയുമായ പി ചിദംബരത്തിൻ്റെ മകൻ കാർത്തി ചിദംബരത്തെ തമിഴ്‌നാട്ടിലെ ശിവഗംഗ മണ്ഡലത്തിലെ സ്ഥാനാർത്ഥിയായി പ്രഖ്യാപിച്ചു. രാജിവെച്ച് കോൺഗ്രസിൽ ചേർന്ന ഐഎഎസ് ഉദ്യോഗസ്ഥൻ ശശികാന്ത് സെന്തിലിന് തിരുവള്ളൂരിൽ മത്സരിക്കാൻ ടിക്കറ്റ് നൽകി. തമിഴ്‌നാട്ടിൽ നിന്നുള്ള സിറ്റിംഗ് എംപി മാണിക്കം ടാഗോർ വീണ്ടും വിരുദ്ധു നഗറിൽ മത്സരിക്കും.
ജമ്മു കശ്മീരിൽ ഉധംപൂർ ലോക്സഭാ സീറ്റിൽ നിന്ന് രണ്ട് തവണ എംപിയായ ചൗധരി ലാൽ സിങ്ങിനെയാണ് കോൺഗ്രസ് മത്സരിപ്പിച്ചത്. കേന്ദ്രമന്ത്രി ജിതേന്ദ്ര സിങ്ങിനെതിരെയാണ് അദ്ദേഹം മത്സരിക്കുന്നത്. ജമ്മു കശ്മീർ കോൺഗ്രസിൻ്റെ വർക്കിംഗ് പ്രസിഡൻ്റും മുൻ സംസ്ഥാന മന്ത്രിയുമായ രാമൻ ഭല്ലയ്ക്കും പാർട്ടി ജമ്മു സീറ്റിൽ നിന്ന് അവസരം നൽകിയിട്ടുണ്ട്. രാജസ്ഥാനിലെ നാഗൗർ ലോക്സഭാ മണ്ഡലം ഹനുമാൻ ബേനിവാളിൻ്റെ രാഷ്ട്രീയ ലോക്താന്ത്രിക് പാർട്ടിക്ക് നൽകി ഹനുമാൻ ബേനിവാൾ നാഗൗറിൽ നിന്ന് ബിജെപിയുടെ ജ്യോതി മിർധയ്‌ക്കെതിരെ ഇന്ത്യൻ ബ്ലോക്കിന് കീഴിൽ ആർഎൽപി സ്ഥാനാർഥിയായി ജനവിധി തേടും. പാർലമെൻ്റിനുള്ളിൽ ബിജെപി എംപി രമേഷ് ബിധുരിയിൽ നിന്ന് വർഗീയ അധിക്ഷേപം നേരിട്ട ബഹുജൻ സമാജ് പാർട്ടി (ബിഎസ്പി) നേതാവ് ഡാനിഷ് അലിയെ ഉത്തർപ്രദേശിലെ അംരോഹ മണ്ഡലത്തിൽ നിന്ന് സ്ഥാനാർത്ഥിയായി നിർത്തിയിട്ടുണ്ട്.