പഞ്ചാബില് കോണ്ഗ്രസും ആം ആദ്മി പാര്ട്ടിയും തമ്മില് സഖ്യമുണ്ടാകില്ലെന്ന് മുഖ്യമന്ത്രിയും എഎപി നേതാവുമായ ഭഗവന്ത് മാന് വ്യക്തമാക്കി. പശ്ചിമ ബംഗാള് മുഖ്യമന്ത്രി മമത ബാനര്ജിയുടെ പ്രഖ്യാപനത്തിന് പിന്നാലെ കോണ്ഗ്രസിന് മറ്റൊരു തിരിച്ചടിയായി എ എ പിയുടെ തീരുമാനം. ഇരു പാര്ട്ടികളും പ്രതിപക്ഷത്തിന്റെ ഇന്ത്യ മുന്നണിയിലെ സഖ്യകക്ഷികളാണ്.
മുന്നണിയിലെ മറ്റൊരുു അംഗമായ തൃണമൂല് കോണ്ഗ്രസ് പശ്ചിമ ബംഗാളില് ഒറ്റയ്ക്ക് മത്സരിക്കുമെന്ന് മമതയുടെ പ്രഖ്യാപനത്തിന്റെ അമ്പരപ്പ് മാറും മുമ്പേയാണ് പുതിയ നീക്കം. വരുന്ന ലോക്സഭാ തിരഞ്ഞെടുപ്പില് ബംഗാളില് ടിഎംസി കോണ്ഗ്രസുമായി സഖ്യമുണ്ടാക്കില്ലെന്ന് ഇന്ന് രാവിലെയാണ് മമത പ്രഖ്യാപിച്ചത്.
ഒറ്റയ്ക്ക് മത്സരിക്കാനുള്ള മമത ബാനര്ജിയുടെ തീരുമാനം എഎപി പിന്തുടരുമോയെന്നും ചോദിച്ചപ്പോള് പഞ്ചാബില് കോണ്ഗ്രസുമായുള്ള സഖ്യം ചെയ്യില്ലെന്നായിരുന്നു മുഖ്യമന്ത്രിയുടെ മറുപടി. കോണ്ഗ്രസുമായി ഒന്നുമില്ലെന്ന് മുഖ്യമന്ത്രി ഭഗവന്ത് മാന് വ്യക്തമാക്കി. സംസ്ഥാനത്തെ 13 ലോക്സഭാ സീറ്റുകളിലും പാര്ട്ടി വിജയിക്കുമെന്ന് അദ്ദേഹം ആത്മവിശ്വാസം പ്രകടിപ്പിക്കുകയും ചെയ്തു. പൊതുതിരഞ്ഞെടുപ്പില് ഒറ്റയ്ക്ക് മത്സരിക്കാനുള്ള ആം ആദ്മി പാര്ട്ടിയുടെ പഞ്ചാബ് ഘടകത്തിന്റെ നിര്ദ്ദേശത്തിന് കെജ്രിവാള് അംഗീകാരം നല്കിയതായി വൃത്തങ്ങള് അറിയിച്ചു.