ടിപി വധക്കേസിലെ ട്രൗസർ മനോജിന് ഇളവ് നൽകാനുള്ള നീക്കത്തിന്‍റെ ഭാഗമായി കെ.കെ രമയുടെ മൊഴിയെടുത്ത എഎസ്ഐയെ സ്ഥലം മാറ്റി. കൊളവല്ലൂർ സ്റ്റേഷനിലെ എഎസ്ഐ ശ്രീജിത്തിനെ വയനാട്ടിലേക്ക് സ്ഥലം മാറ്റി. ടിപി വധക്കേസിൽ നേരിട്ട് പങ്കാളികളായ ടി.കെ.രജീഷ്, അണ്ണൻ സിജിത്, മുഹമ്മദ് ഷാഫി എന്നിവർക്ക് ഇളവ് നൽകാനുള്ള നീക്കമാണ് വിവാദമായത്.
20 വർഷം വരെ ഈ പ്രതികൾക്ക് ശിക്ഷാ ഇളവ് നൽകരുതെന്ന ഹൈക്കോടതി വിധി നിലനിൽക്കെയായിരുന്നു സർക്കാർ നീക്കം. പ്രതികൾക്ക് ശിക്ഷാ ഇളവ് നൽകാനുള്ള നീക്കത്തിൽ ജയിൽ ഉദ്യോഗസ്ഥർക്കെതിരെ കഴിഞ്ഞ ദിവസം സർക്കാർ നടപടി എടുത്തിരുന്നു. അതേസമയം ടി.പി.ചന്ദ്രശേഖരൻ വധത്തില്‍ ഹൈക്കോടതി വിധിക്കെതിരെ പി.കെ.കുഞ്ഞനന്തന്റെ ഭാര്യ വി.പി.ശാന്ത സുപ്രീം കോടതിയെ സമീപിച്ചിരുന്നു.
കേസില്‍ കുഞ്ഞനന്തൻ കുറ്റക്കാരനാണെന്ന ഹൈക്കോടതി വിധിക്ക് എതിരെയാണ് ശാന്ത സുപ്രീം കോടതിയിലെത്തിയത് . കുഞ്ഞനന്തന് വിചാരണ കോടതി വിധിച്ച ശിക്ഷയും ഒരു ലക്ഷം പിഴയും റദ്ദാക്കാന്‍ ആവശ്യപ്പെട്ടാണ് ഹര്‍ജി നല്‍കിയത്. കുഞ്ഞനന്തൻ മരിച്ചതിനാല്‍ ഉത്തരവ് റദ്ദാക്കണം എന്നാണ് ആവശ്യം. ടിപി കേസില്‍ ശിക്ഷിക്കപ്പെട്ട മറ്റ് എട്ട് പ്രതികളും വിധിക്കെതിരെ സുപ്രീം കോടതിയെ സമീപിച്ചിട്ടുണ്ട്.
കേസില്‍ കുഞ്ഞനന്തന് 13-ാം പ്രതിയാണ്. ജീവപര്യന്തം തടവും ഒരു ലക്ഷം രൂപ പിഴയുമാണ് കോടതി വിധിച്ചത്. വിധിക്കെതിരെയുള്ള അപ്പീല്‍ ഹൈക്കോടതിയുടെ പരിഗണനയില്‍ ഇരിക്കെയാണഅ 2020 ല്‍ കുഞ്ഞനന്തന് മരിക്കുന്നത്. തുടർന്ന് കുഞ്ഞനന്തന്റെ ഭാര്യ വി.പി.ശാന്തയെ ഹൈക്കോടതി കക്ഷി ചേർത്തിരുന്നു. കുഞ്ഞനന്തൻ മരിച്ചുവെങ്കിലും അദ്ദേഹം ടിപി വധക്കേസില്‍ കുറ്റക്കാരൻ ആണെന്ന് ഹൈക്കോടതി വിധിച്ചു.
പിഴയായ ഒരു ലക്ഷം രൂപ ശാന്ത നല്‍കണം എന്നും ഹൈക്കോടതി നിർദേശിച്ചു. ഇതിനെതിരെയാണ് ശാന്ത സുപ്രീംകോടതിയില്‍ എത്തിയത്. ടിപി കേസില്‍ ശിക്ഷിക്കപ്പെട്ട അനൂപ്, കിർമാണി മനോജ്, കൊടി സുനി, രജീഷ്, മുഹമ്മദ് ഷാഫി, ഷിനോജ് എന്നിവരും വിധിക്കെതിരെ സുപ്രീം കോടതിയിലെത്തി. കേസില്‍ ശിക്ഷിക്കപ്പെട്ട എട്ട് പേരാണ് സുപ്രീം കോടതിയില്‍ അപ്പീല്‍ നല്‍കിയത്.