കോഴിക്കോട് കുതിരവട്ടം മാനസികാരോഗ്യ കേന്ദ്രത്തിൽ നിന്നും രക്ഷപെട്ട കൊലക്കേസ് പ്രതി പിടിയിലായി. ബീഹാർ വൈശാലി ജില്ലാ സ്വദേശിനി പൂനം ദേവിയാണ് പിടിയിലായത്. മലപ്പുറം വേങ്ങരയിൽ നിന്നാണ് ഇവരെ പോലീസ് പിടികൂടിയത്. ബസ് സ്റ്റാൻഡിൽ നിന്നും ബസിൽ കയറി പോകുന്നതായി പോലീസ് കൺട്രോൾ റൂമിൽ വിവരം ലഭിച്ചതിനെ തുടർന്ന് പോലീസ് എത്തി പിടികൂടുകയായിരുന്നു.
ഭർത്താവായ സഞ്ജിത് പസ്വാനെ കഴുത്ത് ഞെരിച്ച് കൊല്ലപ്പെടുത്തിയ കേസിലെ പ്രതിയാണ് പൂനം.
ഫോറൻസിക് വാർഡിലെ ശുചിമുറിയുടെ ഗ്രിൽ തകർത്താണ് ഇവർ രക്ഷപ്പെട്ടതെന്ന് പോലീസ് അറിയിച്ചു. കടുത്ത മാനസിക അസ്വാസ്ഥ്യം പ്രകടിപ്പിച്ച പൂനത്തിനെ ഇന്നലെയാണ് മാനസികാരോഗ്യ കേന്ദ്രത്തിൽ പ്രവേശിപ്പിച്ചത്.
ഫോറൻസിക് വാർഡ് 5ലായിരുന്നു ഇവരെ പാർപ്പിച്ചത്. ഇന്ന് പുലർച്ചെ 12 15ഓടെ വാർഡിലെ ശുചിമുറിയുടെ വെന്റിലേറ്റർ കല്ലുകൊണ്ട് കുത്തിയിളക്കി അതുവഴി രക്ഷപ്പെടുകയായിരുന്നു. മാനസികാരോഗ്യ കേന്ദ്രത്തിന്റെ സമീപപ്രദേശങ്ങളിലും മുൻപ് ഇവർ താമസിച്ചിരുന്ന മലപ്പുറം വേങ്ങര പ്രദേശത്തും പോലീസ് പരിശോധന നടത്തിയിരുന്നു. ആശുപത്രിയിലെ സുരക്ഷാ ജീവനക്കാരാണ് ഇവർ ചാടി പോയതായി കണ്ടെത്തിയത്. തുടർന്ന് പോലീസിൽ വിവരം അറിയിക്കുകയായിരുന്നു.