കോട്ടയം: പാലായ്ക്ക് സമീപം മാനത്തൂരിൽ ശബരിമല തീർത്ഥാടകർ സഞ്ചരിച്ചിരുന്ന ബസ് അപകടത്തിൽപ്പെട്ടു. വെള്ളിയാഴ്ച അർദ്ധരാത്രിയോടെ ആയിരുന്നു അപകടം നടന്നത്. അയ്യപ്പസംഘത്തിന്റെ മിനിബസ് നിയന്ത്രണം വിട്ട് റോഡരികിലെ മതിലേക്ക് ഇടിച്ചു കയറുകയായിരുന്നു. വാഹനത്തിൽ ഉണ്ടായിരുന്ന 17 പേർക്ക് പരിക്കേറ്റു. അഞ്ചുപേരുടെ നില ഗുരുതരമാണ്. പരിക്കേറ്റവരെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
തമിഴ്നാട് വെല്ലൂരിൽ നിന്നുള്ള ശബരിമല തീർത്ഥാടകരാണ് അപകടത്തിൽപ്പെട്ടത്. ഇടിയുടെ ആഘാതത്തിൽ ബസ്സിന്റെ ജനൽചില്ല് തകർന്നു പുറത്തേക്ക് തെറിച്ചു വീണവർക്കാണ് ഗുരുതരമായി പരിക്കേറ്റിട്ടുള്ളത്. നാട്ടുകാർ വിവരമറിയിച്ചതിനെ തുടർന്ന് രാമപുരം പോലീസും അഗ്നിശമനസേനയും സ്ഥലത്തെത്തിയിരുന്നു. പാലാ ഹൈവേ പോലീസ് ആണ് രക്ഷാപ്രവർത്തനങ്ങൾക്ക് നേതൃത്വം നൽകിയത്. ഡ്രൈവർ ഉറങ്ങിപ്പോയതാകാം അപകടത്തിന് കാരണമെന്നാണ് പോലീസിന്റെ പ്രാഥമിക നിഗമനം.