കൊച്ചി : പറവൂർ ഭക്ഷ്യവിഷബാധയേറ്റ് 65 പേർ ആശുപത്രിയിലായ കേസിൽ സ്ഥാപനഉടമയ്ക്ക് എതിരെ മനപ്പൂർവ്വമായ നരഹത്യാശ്രമത്തിന് കേസെടുത്തു. കേസിൽ ഗുരുതരമായ വീഴ്ചയാണ് ഉണ്ടായിരിക്കുന്നത് എന്നും നടപടി കർശനമാക്കുമെന്നും ആലുവ എസ് പി പറഞ്ഞു. 308 വകുപ്പ് പ്രകാരമാണ് കേസെടുത്തിരിക്കുന്നത്. സ്ഥാപനത്തിന്റെ ഉടമ വെടിമരം സ്വദേശി സിയാദുൽ ഹഖ് ഇപ്പോഴും ഒളിവിൽ തുടരുകയാണ്. സ്ഥാപനത്തിലെ പ്രധാനപാചകക്കാരനെ പോലീസ് ഇന്നലെ അറസ്റ്റ് ചെയ്തിരുന്നു. ഒളിവിൽ കഴിയുന്ന ഒന്നാംപ്രതി ഉടൻ തന്നെ പോലീസ് കസ്റ്റഡിയിലാകും എന്നും പോലീസ് പറഞ്ഞു. അതേസമയം ആരോഗ്യവകുപ്പിന്റെ നേതൃത്വത്തിൽ നഗരത്തിൽ ഇന്നലെയും വ്യാപകമായ പരിശോധന നടന്നുവെങ്കിലും ക്രമക്കേടുകൾ ഒന്നും തന്നെ കണ്ടെത്താൻ സാധിച്ചില്ല.
