തൃശൂര് നാട്ടികയില് തടികയറ്റിവന്ന ലോറി ഉറങ്ങിക്കിടന്നവര്ക്കു മുകളിലേക്ക് നിയന്ത്രണം വിട്ടു പാഞ്ഞു കയറി അഞ്ച് പേര്ക്ക് ദാരുണാന്ത്യം. ഇന്ന് പുലര്ച്ചെ നാല് മണിയോടെയാണ് അപകടം. റോഡരികില് ഉറങ്ങിക്കിടന്ന നാടോടിസംഘത്തിന് മേലാണ് ലോറി പാഞ്ഞുകയറിയത്. മരിച്ചവരില് രണ്ട് പേര് കുട്ടികളാണ്. ഏഴ്പേര്ക്ക് പരിക്കേറ്റു. നാട്ടിക തൃപ്രയാര് ദേശീയ പാതയില് നിര്മ്മാണം നടക്കുകയായിരുന്ന റോഡിലേക്ക് ഡിവൈഡര് തകര്ത്തു കയറിയത്. പാലക്കാട് ഗോവിന്ദാപുരം സ്വദേശികളായ പതിനൊന്നംഗ സംഘമായിരുന്നു റോഡില് കിടന്നുറങ്ങിയത്. ദേശീയ പാതയില് വഴി തിരിയുന്നതിനുള്ള ഡിവൈഡര് വച്ചിരുന്നു. ഇതു തകര്ത്ത് അമ്പത് മീറ്ററോളം കടന്നാണ് റോഡില് കിടന്നുറങ്ങുന്ന പതിനൊന്നംഗ സംഘത്തിന് മുകളിലേക്ക് ലോറി ഇടിച്ചു കയറിയത്.
കാളിയപ്പന് (50), ജീവന് (4), നാഗമ്മ (39), ബംഗാഴി (20) എന്നിവരാണ് മരിച്ചവര്. അപകടത്തില് ഏഴ് പേര്ക്ക് പരിക്കേറ്റിട്ടുണ്ട്. പരിക്കേറ്റവരെ തൃശൂര് മെഡിക്കല് കോളേജ് ആശുപത്രിയില് പ്രവേശിപ്പിച്ചു. നാട്ടിക ജെകെ തിയ്യേറ്ററിനടുത്തായിരുന്നു അപകടം. കണ്ണൂരില് നിന്ന് കൊച്ചിയിലേക്ക് പോകുകയായിരുന്ന ലോറിയാണ് അപകടമുണ്ടാക്കിയത്. സംഭവ സ്ഥലത്ത് വെച്ചു തന്നെ അഞ്ച് പേരും മരിച്ചു.
ലോറിയുടെ ക്ലീനര് അലക്സായിരുന്നു വണ്ടി ഓടിച്ചിരുന്നത്. ഡ്രൈവര് ജോസും വണ്ടിയിലുണ്ടായിരുന്നു. കണ്ണൂരില് നിന്ന് പുറപ്പെട്ട സംഘം മാഹിയില് വച്ച് മദ്യപിച്ചു. മലപ്പുറത്തുവച്ചാണ് ഡ്രൈവര് ക്ലീനര്ക്ക് വണ്ടി കൈമാറിയത്. ക്ലീനര്ക്ക് ലൈസന്സ് ഇല്ലായിരുന്നു എന്നും പൊലീസ് പറഞ്ഞു. അപകടം നടന്നതിന് പിന്നാലെ ലോറി മുന്നോട്ടെടുത്ത് രക്ഷപ്പെടാന് നോക്കി. സര്വ്വീസ് റോഡിലൂടെ എടുത്തെങ്കിലും വഴി അവസാനിച്ചതിനാല് മുന്നോട്ട് പോകാനായില്ല. അപ്പോഴേക്കും പിന്നാലെ ഓടിയെത്തിയ നാട്ടുകാര് ലോറിയിലുണ്ടായിരുന്നവരെ പിടികൂടി. ക്ലീനറേയും ഡ്രൈവറേയും പൊലീസ് അറസ്റ്റ് ചെയ്തു. ഡ്രൈവറും മദ്യപിച്ചിട്ടുണ്ടായിരുന്നു.
നാട്ടുകാരും ആക്ട്സ് പ്രവര്ത്തകരും ചേര്ന്നാണ് രക്ഷാപ്രവര്ത്തനം നടത്തിയത്. തൃശൂര് മെഡിക്കല് കോളെജ് ആശുപത്രിയില് പ്രവേശിപ്പിച്ച ജാന്സിയുടെ നില അതീവ ഗുരുതരമാണ്. ദേവര്ധനന്, ചിത്ര, വിജയ്, ശിവാനി എന്നിവരാണ് പരിക്കേറ്റ മറ്റുള്ളവര്. വാഹനത്തിന്റെ പെര്മിറ്റ് റദ്ദാക്കിയതായി ഗതാഗത മന്ത്രി അറിയിച്ചു. ഡ്രൈവര്ക്കും ക്ലീനര്ക്കുമെതിരെ മനപൂര്വ്വമായ നരഹത്യക്ക് കേസെടുത്തു.