ഉപതിരഞ്ഞെടുപ്പിൽ വഖഫ് വിഷയമാണ് പ്രധാന ചർച്ചയെന്ന് ബിജെപി സംസ്ഥാന പ്രസിഡണ്ട് കെ സുരേന്ദ്രൻ പറഞ്ഞു. മുനമ്പം വിഷയത്തിൽ വർഗീയ ധ്രുവീകരണം നടത്തുന്നത് എല്ഡിഎഫും യുഡിഎഫുമാണെന്നും സുരേന്ദ്രൻ കുറ്റപ്പെടുത്തി. തളിപ്പറമ്പ് രാജരാജേശ്വരി ക്ഷേത്രത്തിനടുത്ത് 600 ഓളം വീടുകളെ ബാധിക്കുന്ന തരത്തില് വഖഫ് ഭീഷണി ഉയര്ന്നുവന്നിരിക്കുകയാണ്. എന്ഡിഎ യും സ്ഥാനാര്ത്ഥി സി.കൃഷ്ണകുമാറും ഇരകള്ക്കൊപ്പം നില്ക്കും. യുഡിഎഫ്- എല്ഡിഎഫ് സ്ഥാനാര്ത്ഥികള് ഈ വിഷയത്തില് നിന്നും ഒളിച്ചോടുകയാണ്. അവര് വോട്ട് ബാങ്ക് രാഷ്ട്രീയം കളിക്കുകയാണെന്നും കെ.സുരേന്ദ്രന് പറഞ്ഞു. മുനമ്പം നിവാസിക്കൾക്ക് വായ്പ എടുക്കാനും നികുതി അടക്കാനും സൗകര്യം ഉണ്ടാക്കണമെന്ന് ആവശ്യപ്പെട്ട സുരേന്ദ്രന് ഇവരെ കുടിയൊഴിപ്പിക്കില്ല എന്നതിന് എന്താണ് ഉറപ്പെന്നും സുരേന്ദ്രൻ ചോദിച്ചു.
“ചേലക്കരയിൽ ബിജെപി അട്ടിമറി വിജയം നേടും. വയനാട്ടിൽ ഇടതുമുന്നണികളേയും പിന്നിലാക്കി മുന്നേറ്റം ഉണ്ടാക്കും. പാലക്കാട് ആധികാരിക വിജയം നേടും. വയനാട്ടിൽ എല്ഡിഎഫ് പ്രസക്തിയില്ല. ചേലക്കരയിൽ ഇരുമുന്നണികളിലും പ്രശ്നങ്ങളാണ്.” ചേലക്കരയിൽ 5000 ത്തോളം വോട്ടുകൾക്ക് വിജയിക്കുമെന്ന വി. ഡി സതീശന്റെ പ്രസ്താവനയെ അദ്ദേഹം പരിഹസിച്ചു.കഴിഞ്ഞ തവണ യുഡിഎഫ് സർക്കാർ ഉണ്ടാക്കുമെന്ന് പറഞ്ഞയാളാണ് സതീശനെന്നും അദ്ദേഹം പറഞ്ഞു.