താരദമ്പതികളായ ജയറാമും പാർവതിയും ശബരിമലയിൽ എത്തി അയ്യനെ തൊഴുതുവണങ്ങി. മാലയിട്ട്, ഭക്തിനിർഭരമായി ശബരിമലയിൽ പ്രാർത്ഥിക്കുന്ന ചിത്രങ്ങൾ ജയറാം തന്നെയാണ് സമൂഹമാധ്യമത്തിലൂടെ പങ്കുവച്ചത്. സന്നിധാനത്ത് സ്ഥിരം സന്ദർശകനാണ് ജയറാമെങ്കിലും പാർവതിക്കൊപ്പം ശബരിമലയിൽ എത്തുന്നത് ഇത് ആദ്യമായാണ്.
ഇന്നലെ വൈകിട്ട് 5.30 ന് ജയറാമിനും മറ്റുചില അടുത്ത ബന്ധുക്കൾക്കൊപ്പവുമാണ് പാർവതി എത്തിയത്. 41 ദിവസം വ്രതമെടുത്താണ് പാർവതി മല ചവിട്ടിയത്. ദീപാരാധന തൊഴുത് പടിപൂജ തൊഴുതശേഷം പാർവതിയും ജയറാമും പുഷ്‌പാഭിഷേകം വഴിപാടായി നടത്തി. നെയ്യഭിഷേകം പോലെ തന്നെ അയ്യപ്പന് ഏറ്റവും ഇഷ്‌ടപ്പെട്ട വഴിപാടുകളിലൊന്നാണ് പുഷ്‌പാഭിഷേകം. തുടർന്ന് രാത്രി എട്ടരയോടെ ഇരുവരും മടങ്ങി.
തമിഴ് നടൻ യോഗി ബാബുവും നടിയും നിർമ്മാതാവുമായ മേനക സുരേഷും വിഷുദിനത്തിൽ ശബരിമലയിൽ ദർശനം നടത്തിയിരുന്നു. വിഷു പൂജകൾക്കായി നടതുറന്ന ശബരിമല സന്നിധാനത്ത് ഭക്തരുടെ വൻതിരക്കാണ് അനുഭവപ്പെടുന്നത്. വിഷു ഉത്സവം പൂർത്തിയാക്കി 19ന് രാത്രി ഹരിവരാസനം പാടി നട അടയ്ക്കും.