പുരാവസ്തുതട്ടിപ്പിലെ കള്ളപ്പണ ഇടപാടില് ഇഡി അന്വേഷണം തുടങ്ങി. മോന്സണ് മാവുങ്കല് പ്രതിയായ പുരാവസ്തു തട്ടിപ്പുകേസില് കെ.പി.സി.സി. പ്രസിഡന്റ് കെ. സുധാകരന് എന്ഫോഴ്സ്മെന്റ് ഡയറക്ടറേറ്റ് നോട്ടീസ്. ഐ.ജി. ലക്ഷ്മണയ്ക്കും മുന് ഡി.ഐ.ജി. സുരേന്ദ്രനും ഇ.ഡി.നോട്ടീസ് അയച്ചിട്ടുണ്ട്. ഈയാഴ്ച ചോദ്യംചെയ്യലിന് കൊച്ചിയിലെ ഓഫീസില് ഹാജാരാകാനാണ് നിര്ദേശം. കെ. സുധാകരൻ ഈ മാസം 18 ന് ഹാജരാകണം, ലക്ഷ്മണ നാളെ എത്തണം, സുരേന്ദ്രൻ 16 ന് ഹാജരാകാനുമാണ് നോട്ടീസ്.
മോന്സണ് മാവുങ്കലുമായി ബന്ധപ്പെട്ട സാമ്പത്തിക ഇടപാടുകളിലാണ് അന്വേഷണം. പുരാവസ്തു തട്ടിപ്പിലെ സാമ്പത്തിക ഇടപാട് കേസിൽ കെ സുധാകരനും, മുൻ ഡിഐജി എസ് സുരേന്ദ്രനും ഹൈക്കോടതി സ്ഥിരം ജാമ്യം നൽകിയിട്ടുണ്ട്.. അന്വേഷണവുമായി സഹകരിക്കണമെന്നും സാക്ഷികളെ സ്വാധീനിക്കാൻ ശ്രമിക്കരുതെന്നുമുള്ള നിർദ്ദേശത്തോടെയാണ് നടപടി.
അതേസമയം, കെ.പി.സി.സി. പ്രസിഡന്റിനെ ഇ.ഡി. വേട്ടയാടുകയാണെന്ന ആരോപണവുമായി കോണ്ഗ്രസ് രംഗത്തെത്തി. ഇ.ഡിയുടേത് വേട്ടയാടല് തന്നെയാണെന്നതില് എന്താണ് സംശയമെന്ന് എ.ഐ.സി.സി. ജനറല് സെക്രട്ടറി കെ.സി. വേണുഗോപാല് പ്രതികരിച്ചു.