സംസ്ഥാനത്ത് ഡ്രൈവിംഗ് ടെസ്റ്റുകള് ഇന്ന് പുനരാരംഭിക്കാനിരിക്കെ പ്രതിഷേധം ശക്തമാക്കി സംഘടനകൾ. ടെസ്റ്റിംഗ് കേന്ദ്രങ്ങളിൽ ഇന്ന് സംഘർഷത്തിന് സാധ്യത കണക്കിലെടുത്ത് വലിയ പോലീസ് സന്നാഹത്തെയാണ് വിന്യസിച്ചിട്ടുള്ളത്. കഴിഞ്ഞ ആറു ദിവസമായി തടസ്സപ്പെട്ടിരുന്ന ടെസ്റ്റുകള് പൊലിസ് സംരക്ഷണത്തിൽ ഇന്ന് മുതൽ പുനരാരംഭിക്കാനായിരുന്നു ഗതാഗത മന്ത്രി കെ ബി ഗണേഷ് കുമാറിന്റെ നിർദ്ദേശം. സ്ലോട്ട് ലഭിച്ചവർ സ്വന്തം വാഹനവുമായി ടെസ്റ്റിനെത്തണമെന്നാണ് മോട്ടോർ വാഹനവകുപ്പ് ഉദ്യോഗസ്ഥർ അറിയിച്ചിരിക്കുന്നത്. ടെസ്റ്റിനെത്തുന്നവരെ സമരം നടത്തുന്നവർ മടക്കിയയച്ച കാഴ്ചയാണ് ഇന്നും ഉണ്ടായത്. ലിസ്റ്റ് ചെയ്തവരുടെ പേരുകൾ ഉദ്യോഗസ്ഥർ വായിച്ചെങ്കിലും എത്തിയിരുന്നില്ല.
ഇന്നലെ ചേർന്ന മോട്ടോര് വാഹന വകുപ്പ് ഉദ്യോഗസ്ഥരുടെ ഉന്നതതല യോഗത്തിലാണ് ഇന്ന് മുതിൽ ഡ്രൈവിഗ് ടെസ്റ്റ് നടത്താൻ തീരുമാനിച്ചത്. ഗതാഗത വകുപ്പ് കർശനമായ നിലപാടാണ് സ്വീകരിച്ചിട്ടുള്ളത്. നിർദേശം പാലിക്കാൻ ഉദ്യോഗസ്ഥർക്കും നിർദേശം നൽകിയിട്ടുണ്ട്. സമരം ശക്തമാക്കുമെന്ന് സമര സമിതിയും അറിയിച്ചിട്ടുണ്ട്. ഈ മാസം 13 ന് സംഘടനകൾ സെക്രട്ടറിയേറ്റ് മാർച്ചും പ്രഖ്യാപിച്ചിട്ടുണ്ട്.
പരിഷ്കരിച്ച സര്ക്കുലര് പ്രകാരം പരമാവധി 40 പേരെ മാത്രം പങ്കെടുപ്പിച്ച് മാത്രം ഡ്രൈവിംഗ് ടെസ്റ്റ് നടത്താനാണ് ഉദ്യോഗസ്ഥര്ക്ക് സര്ക്കാര് തലത്തിൽ നിന്ന് നൽകിയിരിക്കുന്ന നിര്ദേശം. മോട്ടോർ വാഹനവകുപ്പിന് സ്വന്തമായി സ്ഥലമുളളടിത്താണ് ഇന്ന് ടെസ്റ്റ് നടക്കുക. മറ്റ് സ്ഥലങ്ങളിൽ തിങ്കളാഴ്ച മാത്രമേ പകരം സൗകര്യം ഒരുങ്ങുകയുള്ളൂ. കെ എസ് ആർ ടി സിയുടെ സ്ഥലങ്ങളിൽ ഉള്പ്പടെ ടെസ്റ്റ് നടത്താനാണ് തീരുമാനം. സംസ്ഥാനത്ത് ആകെ 86 ഡ്രൈവിംഗ് ടെസ്റ്റ് ഗ്രൗണ്ടുകളാണുള്ളത്. ഇതിൽ 77 എണ്ണം ഡ്രൈവിങ് സ്കൂളികളിടേതാണ്. 9 എണ്ണം മാത്രമാണ് സർക്കാർ , മോട്ടോർ വാഹന വകുപ്പ് ഗ്രൗണ്ടുകൾ ഉള്ളത്. അത്കൊണ്ട് തന്നെ KSRTC യുടെ ഭൂമിയിൽ, മറ്റു സർക്കാർ ഭൂമിയിലെ ഗ്രൗണ്ടുകൾ എന്നിവിടങ്ങളിൽ ടെസ്റ്റുകൾ നടത്താനാണ് തീരുമാനം.