ഇന്നലെ അന്തരിച്ച സംവിധായകൻ സിദ്ധിഖിന് സിനിമാ ലോകവും ചലച്ചിത്ര പ്രേമികളും ഉൾപ്പെടെ കലാകേരളം വിടചൊല്ലി. സിദ്ധിഖിന്റെ ഭൗതികദേഹം എറണാകുളം സെൻട്രൽ ജുമാ മസ്ജിദ് ഖബർസ്ഥാനിൽ ഖബറടക്കി.
കടവന്ത്ര ഇൻഡോർ സ്റ്റേഡിയത്തിൽ പൊതുജനങ്ങൾക്കും സിനിമാ മേഖലയിലുള്ളവർക്കും ആദരാഞ്ജലി അർപ്പിക്കാൻ അവസരം നൽകിയശേഷം പതിനൊന്നരയോടെ മൃതദേഹം പളളിക്കരയിലെ വീട്ടിലേക്ക് കൊണ്ടുപോയി. ചലച്ചിത്ര പ്രവർത്തകരും നാട്ടുകാരും അവിടെയും അന്ത്യാഞ്ജലി അർപ്പിച്ചു. നാലരയോടെയാണ് വിലാപയാത്രയായി എറണാകുളം സെൻട്രൽ ജുമാ മസ്ജിദിലേക്ക് നീങ്ങി. പള്ളിയിൽ ഔദ്യോഗിക ബഹുമതി നൽകിയ ശേഷം നിസ്കാര ചടങ്ങുകൾക്ക് പിന്നാലെ ഖബർസ്ഥാനിൽ ഖബറടക്കം നടന്നു.
സിനിമാമേഖലയിൽ നിരവധി പേര് അന്ത്യോപചാരം അർപ്പിക്കാൻ എത്തിയിരുന്നു. ചേതനയറ്റ പ്രിയ സുഹൃത്തിനെക്കണ്ട് നടനും സംവിധായകനുമായ ലാൽ പലപ്പോഴും വിങ്ങിപ്പൊട്ടി. മമ്മൂട്ടി, ജയറാം, സായികുമാർ, ജഗദീഷ്, ഫാസിൽ, സിബി മലയിൽ, ബി ഉണ്ണികൃഷ്ണൻ, മേജർ രവി, കമൽ തുടങ്ങി താരങ്ങളും സംവിധായകരുമടക്കം സിനിമാ മേഖല ഒന്നാകെ യാത്രാമൊഴി ചൊല്ലാൻ എത്തിയിരുന്നു.
ഇന്നലെ രാത്രി 9 മണിയോടെയാണ് സംവിധായകന് സിദ്ധിഖ് അന്തരിച്ചത്. സിദ്ധിഖ് രണ്ടു ദിവസമായി കൊച്ചി അമൃത ആശുപത്രിയില് എക്മോ സപ്പോർട്ടിലായിരുന്നു ചികിത്സയില് കഴിഞ്ഞിരുന്നത്. കരൾ സംബന്ധമായ രോഗത്തെ തുടർന്ന് ചികിത്സയ്ക്കായി കഴിഞ്ഞ മാസമാണ് സിദ്ധിഖിനെ ആശുപത്രിയിൽ പ്രവേശിപ്പിച്ചത്. കഴിഞ്ഞ ദിവസം ന്യുമോണിയ ബാധിച്ചു. അസുഖങ്ങളില് നിന്ന് പതിയെ മോചിതനായി വരികെയാണ് ഹൃദയാഘാതം സംഭവിച്ചത്. ജീവിതത്തിലേക്ക് തിരിച്ചുവരുമെന്ന പ്രതീക്ഷകൾക്കിടയിലാണ് ഹൃദയാഘാതം സംഭവിച്ച് മരണത്തിന് കീഴടങ്ങിയത്.